एक महिनापछि खुल्यो काँकरभिट्टा नाका, पहिलो खेपमै भित्रियो २५ गाडी कोइला

  प्रकाशित मिति
२७ बैशाख २०७७, शनिबार १७:१८


काँकरभिट्टा नाकाबाट मेची भन्सार भित्रिदै गरेका भारतीय गाडीहरु । फाइल तस्वीर 

मेचीनगर, २७ वैशाख । काँकरभिट्टास्थित पूर्वी नाका एक महिनापछि शनिवार खुलेको छ । नाका खुलेपछिको पहिलो खेपमै कोइला बोकेको २५ वटा गाडीसहित ३० वटा भारतीय मालवाहक गाडी नेपाल भित्रिएका छन् ।

भारतमा कोरोनाको प्रकोप बढेपछि पश्चिम बङ्गाल सरकारले चैत २६ गतेदेखि एकतर्फी रुपमा सीमावर्ती पानीटङ्की नाका बन्द गरेको थियो । त्यसयता काँकरभिट्टा नाकाबाट आयात निर्यात ठप्प थियो । शनिवार पश्चिम बङ्गाल सरकारले नै भारतीय नाका खुला गरेको हो ।

मेची भन्सार कार्यालयका प्रमुख ध्रुव विश्वकर्माले भारतबाट पहिलो खेपमा ३० वटा गाडी नेपाल भित्रिएको जानकारी दिएका छन् । सीमावर्ती पानीटङ्कीस्थित भारतीय भन्सार कार्यालयले मेची भन्सार कार्यालयलाई नाका खुलेको मौखिक जानकारी गराएको थियो । सो जानकारी गराएको केहीबेर पछि पानीटङ्कीबाट गाडीका लस्कर नेपाल पसेका थिए ।

नेपाल इन्टरमोडल यातायात विकास समिति काँकरभिट्टा सुख्खा बन्दरगाहकी प्रमुख अम्बिका सुबेदीले शनिवार नेपाल आइपुगेका ३० वटा गाडीमध्ये २५ वटामा कोइला रहेको बताएकी छन् । सिल खोल्न बाँकी रहेका कारण अरु ५ वटा गाडीमा के छ भन्ने जानकारी भइसकेको छैन । पहिलेदेखि नै मेची भन्सार परिसरमा २५ वटा गाडी पार्किङमा रहेका छन् ।

पश्चिम बङ्गाल सरकारले एकतर्फी रुपमा भन्सार बन्द गरेपछि भारतीय मार्ग हुँदै नेपाल आउने अत्यावश्यक मालसामानको आयात रोकिएको थियो । औषधि, मास्क, तरकारी, खाद्यान्न लगायतका अत्यावश्यक वस्तु समेत पानीटंकी नाकाबाट नेपाल छिर्न दिइएको थिएन ।

एक महिनासम्म कोलकाता बन्दरगाह र सिलगढीमा नेपाली सामान रोकिएका थिए । पेट्रोलियम पदार्थ बोक्ने ट्याङ्करहरु समेत विराटनगरको सीमापारि जोगवनी नाकाबाट भित्रिएर झापा आउने गरेका थिए । जसका कारण इन्धनको ढुवानी महँगो भएको थियो ।

नेपाल सरकारले बोर्डर सिल गरे तापनि भन्सारबाट अत्यावश्यक वस्तुको कारोवार रोक्न चाहेको थिएन । तर नेपालमा संकट परेको बेला भारतले औषधि, खाद्यान्न लगायतका अति आवश्यक वस्तुको कारोवार नाकामा रोकेको थियो ।

शनिवार ३० वटा मालवाहक गाडी नेपाल जान दिए पनि भारतीय भन्सार कार्यालयले नेपालबाट खाली गाडी फर्किन नदिने मौखिक जानकारी दिएको मेची भन्सार कार्यालयका प्रमुख विश्वकर्माले बताएका छन् । त्यो हो भने सामान अनलोड गरेपछि ती गाडी कसरी फर्काउने भन्ने विषयमा अन्योल उत्पन्न भएको छ ।

खाली गाडीलाई पानीटङ्की नाकाबाट जान नदिने हो भने नेपालबाट पेट्रोलियम पदार्थ लिन जाने खाली ट्याङ्करमा समेत अवरोध पुग्ने अवस्था छ । ट्याङ्करहरु भारतमा इन्धन ओसार्न जाँदा नेपालबाट खाली जानु पर्ने हुन्छ । खाली गाडी अरु नाकाबाट जानुपर्ने भारतीय भन्सारको भनाई अव्यावहारिक छ ।

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक :- मोहन काजी न्यौपाने
सम्पादक समूह :
अम्विका भण्डारी
अर्जुन कार्की
डाउनलोड गर्नुहोस्
हाम्रो फेसबुक पेज
%d bloggers like this:
%d bloggers like this: