कार्यकर्ता चौरसियाको हत्या आरोपमा नेकपाकै नेताहरुविरुद्ध मुद्दा दर्ता

  प्रकाशित मिति
१३ कार्तिक २०७७, बिहीबार २०:४३


झापा, १३ कार्तिक । पर्साका नेकपा कार्यकर्ता मुकेश चौरसियाको हत्या आरोपमा नेकपाकै पूर्वसांसदसहित १२ जनाविरुद्ध आज ज्यान सम्बन्धी कसुरमा मुद्धा दर्ता भएको छ ।

मृतकको परिवारले नेपाल कम्युनिस्ट पार्टी (नेकपा) का नेता एवं पूर्वसभासद राजकुमार गुप्तासहित १२ जनाविरुद्ध प्रहरीमा जाहेरी दरखास्त दिएको थियो ।

पहिले जाहेरी लिन नमानेको प्रहरीले आज जिल्ला सरकारी वकिल कार्यालयको आदेशमा जाहेरी दर्ता गरेको हो ।

पीडित परिवारले १२ जनाविरुद्ध किटानी जाहेरी दिएको पर्साका डीएसपी मनोजित कुँवरले जानकारी दिए ।

किटानी जाहेरी परेकामध्ये ३ जना हिरासतमा छन् भने अरुलाई प्रहरीले पक्राउ गरेको छैन ।

यसअघि जाहेरी लिन अस्वीकार गरेको भन्दै नेकपाका नेता तथा कार्यकर्ताहरुले पर्सामा प्रहरी कार्यालयबाहिर प्रदर्शन र नाराबाजी गरेका थिए ।

प्रहरीले जाहेरी लिन नमानेपछि मृतकका परिवारले एकसातादेखि चौरसियाको शव समेत बुझेका थिएनन् ।

प्रहरीले जाहेरी लिएसँगै मृतकका आफन्तले चौरसियाको शव बुझ्ने तयारी भइरहेको र पोष्टमार्टमपछि शुक्रबार अन्त्येष्टि गरिने नेकपा वीरगञ्ज महानगरका अध्यक्ष रहबर अन्सारीले जानकारी दिए ।

चौरसियाको शवलाई अहिले वीरगञ्जस्थित नारायणी अस्पतालमा राखिएको छ ।

नेकपाको विन्दवासिनी गाउँपालिका कमिटीको शपथ ग्रहण कार्यक्रममा कार्तिक ६ गते दुई पक्षबीच झडप हुँदा चौरसिया गम्भीर घाइते भएका थिए ।

उनको उपचारको क्रममा वीरगञ्जस्थित एलएस न्युरो अस्पतालमा मृत्यु भएको थियो ।

स्रोत : अनलाइन खबर

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक : अर्जुन कार्की
सम्पादक: अम्विका भण्डारी
डाउनलोड गर्नुहोस्
हाम्रो फेसबुक पेज
%d bloggers like this:
%d bloggers like this: