गठबन्धनका उम्मेद्वारले भाषण सुन्ने कार्यकर्ता समेत पाउन छाडे : घिमिरे

  प्रकाशित मिति
२५ कार्तिक २०७९, शुक्रबार २०:५४


नेकपा एमालेभित्र निष्ठा र शालिन नेताका रुपमा स्थापित देवराज घिमिरे झापा–२ बाट प्रतिनिधिसभा सदस्यको उम्मेदवार बनेका छन् । राजनीतिक जीवनमा कयौं नेता कार्यकर्ता उत्पादनमा महत्वपूर्ण भूमिका निर्वाह गरेका उनीसँग पत्रकार अच्युत सुवेदीले गरेको कुराकानी प्रस्तुत छ ः

चुनावी अभियान कसरी अघि बढाइरहनु भएको छ ?
चुनावी अभियानलाई प्रभावकारी ढंगबाट अघि बढाएका छौं । यस निर्वाचन क्षेत्रभित्र पर्ने सबै पालिका र वडासम्म घरदैलो चलिरहेको छ । हाम्रो उम्मेदवारीले मतदाता पनि उत्साहित बनेको देखेर हामीमा थप उर्जा प्राप्त भएको छ । नियमित घरदैलोलाई निरन्तरता दिदैं मतदातासँग आवश्यक सुझाव संकलन गर्दै आशिर्वाद लिने काम समेत भइरहेको छ ।

तपाई निर्वाचित हुनुभयो भने यहाँका जनताले के प्राप्त गर्नेछन् ?
असल प्रतिनिधि प्राप्त गर्नुहुनेछ । जीवनको ४७ वर्ष राजनीतिमार्फत मैले गरेको सेवामा कहिकतैं प्रश्न उठाउन दिएको छैन । म सधैं विकास, समृद्धि र सुशासनको पक्षमा रहदै आएको छु । म भ्रष्टाचार विरोधी मान्छे हो । भ्रष्टाचार गर्न पनि दिन्न र गर्दिन पनि । प्रशासन क्षेत्रको सेवालाई चुस्त बनाउनेछु । प्रशासनमा आम नागरिकले असाध्यै झञ्झट व्यहोर्नुपरेको छ ।
आवश्यकता र मागलाई मध्यनजर गरेर विकासका योजनाहरु ल्याउनेछु । अव्यवस्थित बसोबास गर्ने, भूमिहीन गरिव सुकुम्बासीका लागि संविधानले व्यवस्था गरेको आवासको ग्यारेण्टी गर्नेछु । भौतिक पूर्वाधारका क्षेत्रमा बृहत्तर योजना बनाई कार्यान्वयन गर्दै जानेछु । ज्येष्ठ नागरिकको निमित्त आवश्यक सेवा,सुविधा समेतको व्यवस्था गर्नेछु । जनताले म बाट जिम्मेवारी र जवाफदेही प्रतिनिधिको आभास प्राप्त गर्नुहुनेछ । अहिले अधुरा रहेका विकासका तमाम योजनाहरु मेरो कार्यकालभित्र सम्पन्न भएको देख्न पाउनु हुनेछ । खेल क्षेत्रको पूर्वाधार विकास गरिनेछ ।

तपाईका प्राथमिकताका विषय के के हुन् ?
शिक्षा, स्वास्थ्य, रोजगार र विकास नै प्राथमिकताका प्राथमिक विषयहरु हुन् । नागरिकका दैनिक जीवनसँग जोडिएका सबै विषयवस्तुहरु मेरो पहिलो प्राथमिकतामा पर्नेछ । यो क्षेत्र झट्ट हेर्दा सुगम जस्तो लाग्छ । यहि क्षेत्रका कतिपय भूभाग दुर्गम छन् । आधारभूत सडक सञ्जाल समेत नभएको ठाउँहरु देखेको छु । खानेपानी, विजुलीका समस्या पूर्ण रुपमा समाधान गर्दै जानेछु । यो क्षेत्र स्वास्थ्य हवका रुपमा विकास भइरहेको छ । त्यसको थप व्यवस्थापनमा मेरो प्राथमिकता हुनेछ । सुन्दर र हराभरा बनाउन, वातावरण संरक्षण गर्न विज्ञको सल्लाहमा योजना निर्माण गरी कार्यान्वयन गर्दै जानेछु ।
शहरीकरणको विकासले फोहारमैला व्यवस्थापन कठिनाई भइरहेको देखेको छु । भलै, अहिले साउन भदौको जस्तो समस्या छैन । दीर्घकालिन व्यवस्थापनका लागि मेरो तर्फबाट अवश्य सहयोग हुनेछ । सबैको सहयोगबाट काम गर्दै जानेछु ।

जनतामाझ पुग्दा के कस्ता समस्याको पहिचान गर्नु भयो ?
पूर्वाधारसँग सम्बन्धित समस्या नै धेरै छन् । त्यसमा पनि मुलत बाटाघाटाहरु, उत्तरी भेगमा खोलाले दुःख दिएको, त्यसलाई नियन्त्रण गर्न तटबन्ध, पूल निर्माण र दक्षिणी भेगमा हात्तीको समस्या जटिल बनेको छ । त्यस्तै स्वास्थ्य सुबिधा अन्तरगत स्वास्थ्य चौकी वा हस्पिटल निर्माण, बिद्यालयको स्तरबृद्वि र रोजगारीका समस्या उठिरहेका छन् । त्यसको समाधानका लागि कस्ता योजनाहरु रहेका छन् भनेर मतदाताले सोधिरहनुभएको छ र त्यसमा म प्रतिवद्वता जनाइरहेको छु । लामो समयदेखि बन्न नसकेको हर्कलाल मार्ग जस्ता सडकहरु मैले नोट गरेको विषय हो । निर्वाचि भएपछि शुरु नै हर्कलाल मार्गबाट गर्ने मेरो योजना छ । समस्याहरु अनगिन्ती छन्, मैलेभन्दा पनि आम नागरिकले भोग्दै आएका समस्याको पहिचान गरेर समाधान गर्दै जानुपर्ने हुन्छ । यहाँ, गफ गरेर केहि हुने छैन । निर्वाचित गराउनुहोस्, काम गरेर देखाउने मेरो काम हो ।

तपाईको प्रतिस्पर्धी कसलाई ठान्नु भएको छ ?
नेकपा एमालेको मुख्य प्रतिष्पर्धी भनेको देशभर गठबन्धन हो । झापाको यस क्षेत्रमा अलिक फरक छ । वास्तवमा, मेरो प्रतिस्पर्धी देख्दिन । मेरो प्रतिष्पर्धी छैन भने पनि हुन्छ । गठबन्धनको पक्षमा जनता खास देखिदैनन् । सबै पार्टी मिलाएर ठूलो गठबन्धन गर्ने उनीहरुले कोशिस गरिरहेका छन् । तर, उनीहरु आपैmमा कमजोर रहेका छन् । एमाले छोडेको १२ घण्टापछि तिनै व्यक्तिलाई गठबन्धनले उम्मेदवार बनाएको छ । जसको जनमत छैन, उनैलाई उम्मेदवार बनाएको हुँदा मेरो लागि गठबन्धनको उम्मेदवार प्रतिष्पर्धी होइन ।

गठबन्धन के कारणले कमजोर देख्नुहुन्छ ?
जो गठबन्धनका उम्मेदवार हुनुहुन्छ उहाँ छोटो समयको निर्णयमा एमाले छाडेर उता जानुभएको छ । चुनाव चिह्न माओबादीको भए पनि उनीहरुलाई नै आफ्नो नेता हो भन्ने अनुभव भएको छैन । माओबादी प्रति नै कांग्रेसको बितृष्णा र बिरोध रहेको छ । त्यसैले अहिले देशभर कै मतदाता गठबन्धनको पक्षमा छैनन् । अझै झापा २ को अवस्था हेर्ने हो भने त उनीहरुले आपूmभित्र उम्मेदवार नभेटेर अर्को पार्टीको मान्छेलाई फकाएर ल्याएको उम्मेदवारको पक्षमा कार्यकर्ता नै लाग्ने स्थिति छैन । यसै कारण पनि गठबन्धन कमजोर रहेको छ । सबैले देखिरहनु भएको छ, गठबन्धनका चुनावी भेलाहरुको दयनीय अवस्था छ । गठबन्धनको उम्मेदवारले बोल्ने बेला हुँदा आफ्नै कार्यकर्ता भेटिदैनन् । कांग्रेस खुलेर सहयोग गरिरहेको छैन । माओवादीले आफ्नो उम्मेदवारले आँट नगरेपछि एमाले छोडेको व्यक्तिलाई उम्मेदवार बनाएको छ ।

दलहरुप्रति वितृष्णा र स्वतन्त्रप्रति आकर्षण बढेको छ भनिन्छ । साँचो के हो ?
यो भ्रामक कुरा हो । अपवादका घटनालाई जोडेर स्वतन्त्रप्रति आकर्षण भएको भन्न मिल्दैन । झापामा स्वतन्त्रको कुनै अर्थ छैन । अझ मेरो क्षेत्रमा कोहि स्वतन्त्र उम्मेदवार बन्नु भएको छ भने त्यो एउटा मजाक मात्रै हुन्छ । कसैले उम्मेदवारी दिए भन्दैमा स्वतन्त्रप्रति आकर्षण भन्न मिल्दैन ।
दलप्रतिको एउटा बिरोध हुन सक्छ । जनताका समस्या समाधान नभएर दलहरुप्रति बिरोध गरेको होला । यसको मतलव स्वतन्त्र प्रति आकर्षण भन्न मिल्दैन । अहिलेसम्मको परिवर्तन दलहरुले नै ल्याएको भन्ने कुरा सबैमा हेक्का छ । स्वतन्त्रले दललाई गाली मात्रै गर्ने हुन् । जसको कतै योगदान छैन, योजना छैन कार्यक्रम छैन । उसले दलहरुलाई गाली गरेर हिड्ने नै हो । अर्को कुरा स्वतन्त्रले जिते पनि सरकार बनाउने स्थिति हुदैन । संविधानले स्वतन्त्रको परिकल्पना पनि गरेको छैन । त्यसैले स्वतन्त्रलाई मतदान गर्नु भनेको बलुवामा पानी मात्रै हुन्छ । यसैले मतदानमा सोचविचार गर्नुहोस्, भन्न चहान्छु । दलहरुका कमिकमजोरी सच्याएर जान सकिन्छ । दलहरुको विकल्प स्वतन्त्र हुन सक्दैनन् ।
दलहरु प्रति आकर्षण गर्ने कुरा जहाँसम्म छ, यो संभव छ । नयाँ पुस्तालाई राजनीतिक दलले ल्याएका परिवर्तन बारे बुझाउन सकिन्छ । त्यसमा पनि नेकपा एमाले जस्तो राष्ट्रबादी शक्तिले गरेका कामहरुलाई अध्ययन गर्ने र बुझ्ने कोशिस गर्ने हो भने आकर्षण सहजै हुनेछ ।

गठबन्धनलाई परास्त गर्न सक्ने तपाइको आधार के छ ?
मुख्य आधार भनेकै एमालेले गरेका काम हुन् । यो कुरालाई नेपाली जनताले बुझ्नु भएको छ । एमालेबाट गठबन्धनलाई मत जाँदैन । बरु, झापा २ मा गठबन्धनको समेत एमालेलाई मत आउनेमा हामी विश्वस्त छौ । जसले गर्दा गठबन्धन बलियो छैन । अर्को आधार स्थानीय निर्वाचनमा वडा अध्यक्षले पाएको मत हिजो सबै स्थानीय उम्मेदवार हुँदाको स्थिति हो । तर आज त्यो हुँदैन । आफन्त, नातागोताले गर्दा मत यता उता भएको थियो । त्यो राजनीतिक भन्दा पनि व्यवहारिक थियो । तर अहिले त्यस्तो हुँदैन । अहिले त पार्टीमा उम्मेदवारले खेलेको भूमिका, राजनीतिक छवि, उसका प्रतिवद्वता, घोषणापत्र आदिको मुल्याङ्कन हुन्छ । जसले गर्दा मेरो जीत सुनिश्चित छ ।

उम्मेदवारहरु चुनाव जितेपछि गाउँ फर्कदैनन् भन्ने आरोप छ नि ?
असन्तुष्टि मैले पनि सुनेको छु । गाउँ फर्किने भन्दा पनि उनीहरुले बाचा पूरा गरे कि गरेनन् भन्ने हो । उम्मेदवार यहीँ भए दवाव दिन सकिन्छ भन्ने हो । तर काम गर्ने प्रतिवद्वता पाएपछि त्यो कुराले खासै फरक पार्दैन जस्तो लाग्छ मलाई । जनतालाई नेताको उपस्थिति भन्दा पनि विकास चाहिएको छ । म यसै ठाउँको बासिन्दा हुँ, नफर्किने त कुरै छैन । मेरो प्राथमिकता नै विकास हो । म चुनाव जितेपछि पनि गाउँमा आउनेछु, उहाँहरुको समस्याको समाधानमा ध्यान दिनेछु ।

निर्वाचन आयोगले भड्किलो चुनाव प्रचारको शैलीलाई परिमार्जन गरेको छ । यसले कतिको प्रभाव पारेको छ ?
हामी पनि भड्किलो चुनावको पक्षमाा छैनों । एमालेले जनताको निम्ति गरेका काम नै पर्याप्त भएको हुँदा चुनावमा तडकभडक जरुरी छैन ।

अन्त्यमा, आम मतदातालाई के भन्नुहुन्छ ?
आम मतदातालाई हिजोका प्रतिनिधिले के कारणले काम गर्न सकेनन् भन्ने कुरा चाहिँ बुझिदिन अनुरोध गर्छु । त्यो कारण ठिक हो कि हैन निष्पक्ष भएर बुझिदिन पनि अनुरोध छ । अब काम गर्ने आधार हामीले जे दिएका छौँ त्यसमा बिश्वास राखेर आगामी मंसिर ४ गतेको प्रतिनिधि सभा र प्रदेश सभा निर्वाचनमा चार वटै मतपत्रमा सूर्य चिन्हमा मतदान गरेर एमालेका उम्मेदवारलाई बिजयी गराइदिनु हुन अनुरोध गर्दछु । एमालेले विजय हासिल गर्न सकेन भने देश फेरि दुर्घटनामा पर्नेछ । देशलाई जोगाउने हो भने राष्ट्रबादी शक्ति एमालेको विजयी आवश्यक छ । यदि गठबन्धनको हातमा देश पुग्यो भने सारा नेपालीले दुख पाउनुपर्ने छ । देश विकास गरेर समृद्ध नेपाल सुखी नेपालीको राष्ट्रिय आकांक्षालाई पुरा गर्न सूर्य चिह्नमा मतदान गर्नुहोस् ।

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक : अर्जुन कार्की
डाउनलोड गर्नुहोस्
हाम्रो फेसबुक पेज
%d bloggers like this:
%d bloggers like this: