चन्द्रगढी र हातेमालोमा वैज्ञानिक वन लागू

  प्रकाशित मिति
२४ बैशाख २०७५, सोमबार १०:३८


भद्रपुर । सरकारले ल्याएको वैज्ञानिक वन व्यवस्थापन कार्यक्रमलाई पहिलोपटक झापामा चन्द्रगढी सामुदायिक वन र हातेमालो सामुदायिक वन उपभोक्ता समितिले लागू गर्ने भएका छन् ।

चन्द्रगढी सामुदायिक वन उपभोक्ता समितिको सभाहल चन्द्रगढीमा आयोजित कार्यक्रममा दुवै समितिका अध्यक्षहरुले सो जानकारी गराएका हुन् ।

कार्यक्रमको औचित्यमाथि प्रकाश पार्दै चन्द्रगढी सामुदायिक वन उपभोक्ता समितिका अध्यक्ष हीराप्रसाद पोखरेलले वन सम्पदाको संरक्षण गर्दै पर्यटकीय क्षेत्रको विकास गराउने उद्देश्यका साथ वैज्ञानिक वन व्यवस्थापनलाई कार्यान्वयन गर्न लागेको बताए ।

उनले ८० वर्ष माथिका साल जातका रुखबाट अक्सिजन प्रदान गर्ने क्षमता समेत घट्ने भएकाले ती रुखहरुको उचित व्यवस्थापन गरी नयाँ बिरुवा उत्पादनमा जोड दिइने बताए ।

उनले सरकारले लागू गरेको ८० वर्षे वैज्ञानिक वन व्यवस्थापनलाई कार्ययोजना बनाई चन्द्रगढी सामुदायिक वनबाट माऊ रुख १२८ वटा तथा कटान हुने रुख १०२ वटालाई चुना लगाएर संरक्षण गरिएको बताए ।

त्यस्तै, हातेमालो सामुदायिक वन उपभोक्ता समूहको माऊ रुख ११५ वटा तथा कटान हुने रुख ३२७ वटा रहेका छन् ।

पोखरेलले वैज्ञानिक वन व्यवस्थापनबाट प्राप्त हुने आम्दानीले उपभोक्ताको आर्थिक, सामाजिक तथा साँस्कृतिक विकास गर्दै वन क्षेत्रलाई पर्यटकीय क्षेत्रको रुपमा परिणत गर्ने योजना रहेको बताए ।

सहायक वन अधिकृत राजन राईले वैज्ञानिक वन व्यवस्थापन योजनाले गरिबी न्यूनीकरण हुनुका साथै आर्थिक र सामाजिक रुपले समेत समृद्धि हुने बताए ।

कार्यक्रममा पत्रकार चिन्तामणि दाहालले ऐतिहासिक स्थल चन्द्रगढको स्तरोन्नतिमा समितिले उल्लेखनीय भूमिका खेल्नुपर्नेमा जोड दिए ।

हातेमालो वन उपभोक्ता समितिका अध्यक्ष प्रेमप्रसाद पौडेलको अध्यक्षता तथा चन्द्रगढी सामुदायिक वन उपभोक्ता समितिकी सचिव सकुन्तला पोखरेलको सञ्चालनमा सम्पन्न कार्यक्रमको स्वागत चन्द्र सिग्देलले गरेका थिए ।

चन्द्रगढी वन ४३०.५९ हेक्टर र हातेमालो सामुदायिक वन ३९१.२७ हेक्टरमा फैलिएको छ ।

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक : अर्जुन कार्की
सम्पादक: अम्विका भण्डारी
डाउनलोड गर्नुहोस्
हाम्रो फेसबुक पेज
%d bloggers like this:
%d bloggers like this: