च्याउबाटै करोडपति

  प्रकाशित मिति
६ भाद्र २०७३, सोमबार १०:५९


Shyam Bhattaraiबाहुनडाँगी । विश्व प्रसिद्ध अङ्ग्रेजी साहित्यकार तथा दार्शनिक थोमस पेइनले भनेका छन्–‘जति कठिन सङ्घर्ष हुन्छ, विजयी त्यति नै शानदार हुन्छ ।’ मानिस जन्मिएपछि नै सङ्घर्षको अध्याय सुरु हुन्छ । जीवनलाई असल मार्गमा र सफलताको सिँढीमा उकाल्नका लागि लामो सङ्घर्ष, त्याग र जीवनको उर्वर समय खर्चिएको हुन्छ । त्यस्तै एक आदर्श पुरुष हुन् झापाको बाहुनडाँगी–७ गाडागल्लीका श्यामराज भट्टराई ।

पढेकाले कृषिमा लाग्नु हुँदैन भन्ने मानसिकतालाई चिर्दै भट्टराईले कृषि पेसा सुरु गरे । ८० प्रतिशतको हाराहारीमा कृषिमा आश्रित जनसङ्ख्या भए पनि केही अलग ढङ्गले उनले आफूलाई डोहोर्याउन सफल भए । त्यसैले अहिले उनी सफल कृषक भएका छन् । ‘८० हजारमा च्याउ खेती सुरु गरेँ, निरन्तरको मेहनतले नै अहिले सानो–ठूलो भए पनि लगानी गर्न सक्ने भएको छु’–उनले भने ।

श्यामराज भट्टराईले अहिले झापाको बाहुनडाँगीमै भट्टराई एग्रीकल्चर एन्ड स्पोन प्रालिको स्थापना गरेका छन् । व्यवस्थापन सङ्कायमा स्नातक तहमा पढ्दा–पढ्दै भट्टराईले कृषिको विकास र त्यसैबाट जीवनयापन गर्ने सपना देखे । र, कार्यान्वयनमा जुटे । ‘शङ्करदेव क्याम्पसमा ब्याचलर पढ्दा–पढ्दै धन कमाउने मन भयो, र व्यवसाय सुरु गरे’, उनले भने – ‘स्थायी रुपमा वि.सं. २०५४ सालदेखि च्याउ खेती सुरु गरेँ, अहिले विस्तारको काममा व्यस्त छु ।’

भट्टराईले कृषिमा गरेको सङ्घर्षको कथा लामो छ । र, आमनेपाली युवाका लागि प्रेरक पनि छ । २०३१ साल असार २१ गते बुवा हिरण्यप्रसाद र आमा स्व. सुभद्रादेवी भट्टराईको कोखबाट धनगढीमा जन्मिएका श्यामराज अहिले झापा फर्किएर व्यवसायमा जम्ने कोसिसमा छन् । २०४७ सालमा मेची जनसाधारण माविबाट एसएलसी उतीर्ण गरेका भट्टराईले सुपथ मूल्यको सहकारी पसल खोले । दुई वर्ष जति पसल गरेपछि उनले चीनबाट सामान ल्याउने व्यवसाय सुरु गरे । तर, उनको मन कृषि पेसातर्फ नै थियो । ‘त्यसैले कसरी हुन्छ कृषिमै भविश्य बनाउने सोचका साथ नयाँ कामको रिसर्चमा लागेँ’, उनले लोकतन्त्र पोस्टसँग भने–‘त्यसैले २०५४ सालबाट च्याउ खेतीमा लागेँ ।’

Hotel Mashroomभट्टराईको च्याउ खेती यात्रा काठमाडौंको बलम्बुबाट सुरु भयो । ‘एक रोपनीमा च्याउ लगाएँ, २ वर्षपछि झापा फर्किएँ’, उनले भने–‘र, च्याउको बिउ उत्पादनमा लागेँ ।’ फेरि काठमाडौं फर्किएपछि उनले कीर्तिपुरमा ल्याव खोले । २०६० सालमा खोलिएको ल्यावबाट उनले मनग्गै आम्दानी गरे । ५ वर्षपछि उनी धापाखेल सरे । ‘धापाखेलमा मार्केट राम्रो थियो’, उनी भन्छन्–‘पोखरामा पनि ल्याव सञ्चालनमा ल्याएँ ।’

वि.सं. २०६८ सालमा पोखरामा च्याउ उत्पादन गर्ने ल्याव खोल्न पुगेका भट्टराईले माग अनुसार च्याउ उत्पादन गर्न सकेनन् । ‘बजार ठूलो, माग पनि धेरै’, उनले थपे–‘राम्रो उत्पादन भएकाले पनि हामीलाई बजार माग धान्नै गाह्रो पर्यो ।’ धेरै भन्दा पनि गुणस्तरीय उत्पादनमा ध्यान दिएको उनले बताए । भट्टराईका अनुसार काठमाडौं र पोखरामा च्याउको बजार ठूलो छ । माग अनुसारको उत्पादन गर्न सके सयौंलाई रोजगारी दिन सकिने र लाखौंको नाफा गर्न सकिने उनको धारणा छ ।

वि.सं. २०७२ वैशाख १२ गतेको विनासकारी भूकम्पको प्रभाव भट्टराईको व्यवसायमा पनि पर्यो । भारतीय नाकाबन्दीले च्याउ उत्पादनका लागि चाहिने इन्धन र अन्य अत्यावश्यकीय सामग्रीको अभाव भएपछि उनी फेरि झापा फर्किए । ‘बाहुनडाँगीमा भट्टराई एग्रीकल्चर एन्ड स्पोन प्रालिमार्फत कृषिकै लागि काम थालेँ’, उनले भने–‘च्याउ उत्पादनको काम झापामै सुरु गरेँ ।’ भट्टराईको नेतृत्वमा झापाको काँकरभिट्टामा होटल मसरुम खुलेको छ । भट्टराईको टिममा उर्मिला कोइराला, रोशन बस्नेत र रोशन निरौला रहेका छन् । ‘सस्तोमा गुणस्तरीय सेवा दिने हाम्रो उद्देश्य हो’, भट्टराईले भने–‘सेवा दिएपछि आफै नाफा हुन्छ । हामीलाई धेरै नाफा कमाउँछु भन्ने छैन ।’ चाँडै १२ बिगाह जग्गामा अर्गानिक खेती गर्ने योजनामा रहेका भट्टराई च्याउ खेतीमा लाग्न चाहनेलाई तालिम प्रदान गर्दै आएका छन् ।

भट्टराईले करिब २२ लाख रुपैयाँको लगानीमा होटल खोलेका हुन् । ८ जनाले होटलमा रोजगारी पाएको उनले बताए । बाहुनडाँगी–६ मा च्याउ उत्पादन गर्नका लागि ११ लाख रुपैयाँको लगानीमा ल्याव निर्माण गरिएको छ । ‘च्याउको ल्यावमा ९ जना युवालाई रोजगारी प्रदान गरिएको छ’, उनले थपे – ‘अर्गानिक खेती गरेपछि अझै धेरैले रोजगारी पाउँछन् ।’ भट्टराईले च्याउबाटै आर्थिक समृद्धि हासिल गर्न सकिने उदाहरण चाँडै पेश गर्ने उद्घोष गरे । उनी भन्छन् – ‘विदेश जानै पर्दैन, च्याउमा लगानी गर्ने हो भने दैनिक दशौँ हजार आम्दानी गर्न सकिन्छ ।’ ८० हजारबाट सुरु गरेको व्यावसायिक च्याउ खेतीबाट उनले १ करोडभन्दा धेरैको सम्पत्ती आर्जन गरेका छन् । ‘तर, कुन च्याउ कुन ठाउँमा लगाउने हो त्यस विषयमा जानकारी हुनु पर्छ, मेहनत गरे च्याउबाटै लाखौँ कमाउन सकिन्छ’, उनले थपे – ‘त्यसै कारणले बाहुनडाँगीलाई च्याउ उत्पादन केन्द्रकै रुपमा अघि बढाउने मेरो अठोट हो ।’

(लोकShyam Bhattaraiतन्त्र पोस्ट दैनिकमा २०७३ भदौ ६ गते प्रकाशित)

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक :- मोहन काजी न्यौपाने
सम्पादक समूह :
अम्विका भण्डारी
अर्जुन कार्की
डाउनलोड गर्नुहोस्
हाम्रो फेसबुक पेज
%d bloggers like this:
%d bloggers like this: