पीसीआर ल्याबका लागि ९ वटा पालिकाको प्रतिबद्धता

  प्रकाशित मिति
२६ असार २०७७, शुक्रबार १५:१८


मेचीनगर । एकका लागि एक अभियानको अगुवाईमा सरकार–समुदाय–सहकारी अभियानको साझेदारीमा झापामा पीसीआर ल्याव स्थापनाका लागि झापाका पालिकाहरुले सहयोग गर्ने प्रतिबद्धता जनाएका छन् ।

कनकाई नगरपालिकाको कोटीहोमस्थित समर्पण राष्ट्रिय अभियानको भवनमा पीसीआर ल्याब स्थापनाका लागि भइरहेको निर्माण कार्यको शुक्रबार अवलोकनपछि छलफलमा पालिकाका प्रमुख, उपप्रमुख तथा प्रतिनिधिहरुले त्यस्तो प्रतिबद्धता जनाएका हुन् ।

अभियानका संयोजक महेन्द्रकुमार गिरीको सभापतित्वमा भएको छलफलमा उनले पीसीआर ल्याबको सम्पूर्ण तयारी पूरा गरी साउन पहिलो हप्ताबाट सञ्चालनमा आउने गरी प्रदेश सरकारलाई हस्तान्तरण गरिने बताए ।

गिरीले नागरिक समाज, सरकार र सहकारी अभियानको साझेदारीको नमूनाको रुपमा सञ्चालनमा आउने ल्याबका लागि झापाका पालिकाहरुसँग सहयोगको आह्वान गरेका थिए ।

छलफलमा कनकाई नगरपालिकाका प्रमुख राजेन्द्रकुमार पोखरेलले पूर्ण तयारी गरी प्रदेश सरकारलाई हस्तान्तरण गरिने ल्याब सञ्चालन तथा व्यवस्थापनको आवश्यक जिम्मेवारी लिन स्थानीय सरकार तयार रहेको बताए ।

प्रदेश सरकारले मेची अञ्चल अस्पतालको मातहतमा रहने गरी कोटीहोममा पीसीआर ल्याब सञ्चालन गर्ने बताइएको छ ।

बिर्तामोड नगरपालिकाकी कार्यवाहक प्रमुख पवित्रा महतारा प्रसाईं, शिवसताक्षी नगरपालिकाकी उपप्रमुख भोजकुमारी नेपाल, कनकाई नगरपालिकाकी उपप्रमुख मञ्जु प्रसाईं, झापा गाउँपालिकाका अध्यक्ष जयनारायण साह, बुद्धशान्ति गाउँपालिकाका अध्यक्ष रमेशकुमार भुजेल, बाह्रदशी गाउँपालिकाका प्रमुख प्रकाशकीय अधिकृत राजेन्द्र दाहालले आफ्नो पालिकाका तर्फबाट उक्त कार्यका लागि आवश्यक सबै सहयोग गर्ने प्रतिबद्धता जनाएका थिए ।

अभियानले शुक्रबार पहिलोचरणमा झापाका नौ पालिकासँग छलफलको आयोजना गरेको थियो ।

छलफलका क्रममा मेचीनगरका प्रमुख विमल आचार्य, अर्जुनधाराका प्रमुख हरिकुमार राना, बाह्रदशी गाउँपालिकाका अध्यक्ष खड्गप्रसाद राजवंशी, हल्दिबारी गाउँपालिकाका अध्यक्ष रवीन्द्र लिङ्देनले अभियानकर्मीसँगको टेलिफोन संवादमा आफ्नो पालिकाको तर्फबाट समेत महत्वपूर्ण सहयोग गर्ने प्रतिबद्धता गरेका थिए ।

पीसीआर ल्याबको प्राविधिक पक्षबारे नेपाल रेडक्रस सोसाइटी झापाका सभापति लोकराज ढकाल र बिर्तामोड उपशाखाका सभापति सजेश शिवाकोटीले जानकारी गराएका थिए ।

छलफलमा सहभागी पालिकाका प्रमुख तथा प्रतिनिधिहरुले जतिसक्दो छिटो पीसीआर स्थापना गरी झापामा नै कोरोना भाइरस परीक्षणको काम थाल्न जोडदार माग गरेका थिए ।

छलफलमा अभियानका सदस्य तथा सहभागीका तर्फबाट कुमार भट्टराई, मदनगोपाल सुब्बा, गोपाल ओली, लीला चिमरिया, कुमारमणि पोखरेल, शिव कँडेल, केदार गिरी, अर्जुन चुडाल, ख्याम ओली, नारायण ओली, गजेन्द्र पौडेल लगायतले पालिकाहरुबाट भएको सहयोगको घोषणाले अभियानमा थप उत्साह प्राप्त भएको बताएका थिए ।

कार्यक्रममा अभियानका सहसंयोजक विनोद बस्नेतले धन्यवाद ज्ञापन गरेका थिए ।

छलफलको संयोजन संवाद समूह झापा र कनकाई नगरपालिका तथा सहजीकरण पत्रकार महासंघ झापाका उपाध्यक्ष एकराज गिरीले गरेका थिए ।

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक :- मोहन काजी न्यौपाने
सम्पादक समूह :
अम्विका भण्डारी
अर्जुन कार्की
डाउनलोड गर्नुहोस्
हाम्रो फेसबुक पेज
%d bloggers like this:
%d bloggers like this: