मेचीनगरको स्वागतयोग्य निर्णय : अब कोरोना संक्रमितलाई घरमै अक्सिजन र खाद्यान्न पुर्याइने

  प्रकाशित मिति
२६ कार्तिक २०७७, बुधबार १९:४८


झापा, २६ कार्तिक । मेचीनगर नगरपालिकाले कोरोना संक्रमित भएर होम आइसोलेसनमा बसेका व्यक्तिहरुलाई आपतकालीन अवस्था आइपरेमा अक्सिजन र खाद्यान्न घरमै पुर्याउने निर्णय गरेको छ ।

कोभिड १९ को संक्रमण तीब्र रुपमा फैलिइरहेका बेला मेचीनगरले अरु पालिकाहरुभन्दा पृथक र अति महत्वपूर्ण निर्णय आज अप्रत्यासित रुपमा गरेको छ ।

कार्यवाहक नगरप्रमुखको जिम्मेवारी समेत प्राप्त उपप्रमुख मीना पोखरेल उप्रेतीको अध्यक्षतामा आज बसेको कार्यपालिकाको बैठकले उक्त निर्णय गरेको हो ।

बैठकले कोरोना संक्रमित भएका अति विपन्न नगरवासीका लागि आइसोलेसन अवधिभर न्यूनतम् १४ दिनका लागि पुग्दो खाद्यान्न समेत उपलब्ध गराउने अर्को निर्णय समेत गरेको उपप्रमुख उप्रेतीले बताएकी छन् ।

उनका अनुसार कोरोनाको संक्रमण बढिरहेको र अधिकांश विपन्न तथा गरीव नगरवासीहरु होम आइसोलेसनमै कष्टपूर्वक बसिरहेको जानकारी भएको हुँदा उनीहरु भोकले प्रताडित हुन नपरोस् भनेर नगरपालिकाले अभिभावकको रुपमा जिम्मेवारी पूरा गर्न खाद्यान्न समेत दिने निर्णय गरिएको हो ।

नगरभित्रका कोरोना संक्रमितहरुको अवस्था बुझ्न र नियमित परामर्श दिनका लागि रेपिड रेस्पोन्स टिम गठन गर्ने निर्णय पनि कार्यपालिका बैठकले गरेको छ । नियमित रुपमा टेलिफोन वा अन्य माध्यमबाट उक्त टिमले संक्रमितसँग सम्पर्क गरेर उपचारमा सहजिकरण गर्ने बताइएको छ ।

तिहार र छठमा भीडभाड हुँदा संक्रमण झनै बढ्ने सम्भावना भएको जनाउँदै बैठकले दसैंमा झैं आफ्नै घरपरिवारमा चाडपर्वलाई सीमित राखेर मनाउन अनुरोध गर्ने निर्णय गरेको छ ।

यसअघि नै मेचीनगर नगरपालिकाले धाइजन स्वास्थ्य चौकी रहेको भवनमा कोभिड अस्पताल सञ्चालन गर्ने निर्णय गरिसकेको छ । त्यहाँ रहेको ३० वटा आइसोलेसन बेडमै अक्सिजको व्यवस्था मिलाइने बताइएको छ ।

नगरपालिकामा नयाँ प्रमुख प्रशासकीय अधिकृतको आगमन भएको अवस्थामा भएको यो कार्यपालिकाको बैठकमा पुराना र नयाँ दुबै अधिकृतको उपस्थिति रहेको थियो ।

बैठकको सञ्चालन नयाँ प्रमुख प्रशासकीय अधिकृत खेमराज ओझाले गरेका थिए ।

बैठकले हाल अस्पतालमा उपचाररत नगरप्रमुख विमल आचार्यको शीघ्र स्वास्थ्यलाभको कामना गरेको थियो ।

नयाँ प्रमुख प्रशासकीय अधिकृत ओझालाई स्वागत र विदाई हुने प्रमुख प्रशासकीय अधिकृत दिनानाथ लम्साललाई सम्मानपूर्वक विदाई गर्ने निर्णय समेत बैठकले गरेको थियो ।

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक : अर्जुन कार्की
सम्पादक: अम्विका भण्डारी
डाउनलोड गर्नुहोस्
हाम्रो फेसबुक पेज
%d bloggers like this:
%d bloggers like this: