सुखानीका सहिदप्रति प्रमको श्रद्धाञ्जलि

  प्रकाशित मिति
२१ फाल्गुन २०७२, शुक्रबार ०३:०४


झापा, २१ फागुन । नेकपा (एमाले)का अध्यक्ष तथा प्रधानमन्त्री केपी शर्मा ओलीले पञ्चायत विरोधी सङ्घर्षका क्रममा सुखानीमा जीवन उत्सर्ग गर्ने पाँच सहिदको योगदानको स्मरण गर्दै उनीहरुप्रति भावपूर्ण श्रद्धाञ्जलि व्यक्त गरेका छन् ।

प्रधानमन्त्री ओलीले आज प्रेस विज्ञप्ति जारी गर्दै सुखानीमा जीवनोत्सर्ग गर्ने रामनाथ दाहाल, नेत्र घिमिरे, वीरेन राजवंशी, नारायण श्रेष्ठ र कृष्ण कुइँकेल लगायत सहिदप्रति पार्टीका तर्फबाट श्रद्धाञ्जलि अर्पण गरेका हुन् । विसं २०२९ फागुन १९ गते तत्कालीन निरङ्कुश शासकविरुद्ध विद्रोह गर्ने क्रममा बन्दी बनाइएका नेपालको लोकतान्त्रिक र कम्युनिस्ट आन्दोलनका निम्ति लड्ने झापाका पाँच अग्रज नेतालाई चन्द्रगढी कारागारबाट इलाम सार्ने निहुँमा सुखानीको जङ्गलमा लगी कायरतापूर्वक हत्या गरिएको थियो ।

‘व्यक्तिगत सुखसुविधा र पारिवारिक हितको कुनै परवाह नगरी निरङ्कुशतन्त्रविरुद्ध बलिदानी सङ्घर्षमा होमिने उहाँहरूको सङ्घर्षशील जीवन एवम् देश, जनता र क्रान्तिको पक्षमा बुलन्द आवाज उठाउँदै हाँसीहाँसी मृत्युको सामना गर्ने गौरवशाली सहादतले नेपाली जनतालाई लोकतान्त्रिक आन्दोलनमा होमिन उत्प्रेरणा प्रदान गरेको थियो’– विज्ञप्तिमा उल्लेख छ । उनीहरूकै बलिदानको जगमा उभिएको एमाले आज राष्ट्रिय राजनीतिको केन्द्रबिन्दु बन्न सफल भएको र सहिदको आदर्शबाट प्रेरित जनताको आन्दोलनका बलमा मुलुकमा सङ्घीय लोकतान्त्रिक गणतन्त्र स्थापना भएका उनले बताए ।

‘जनता सम्प्रभु एवम् अधिकारसम्पन्न भएका छन्, नेपालको संविधान जारी भएर मुलुक दिगो शान्ति, समुन्नत लोकतन्त्र, राजनीतिक स्थिरता, सामाजिक न्याय र समृद्धिको दिशामा अग्रसर भएको छ, हामीले प्राप्त गरेका यी युगान्तकारी उपलब्धिमा सहिदको प्रेरणाले सदैव मार्गदर्शन गरिरहेको छ’– विज्ञप्तिमा भनिएको छ ।

सहिदका यिनै अविस्मरणीय योगदानलाई स्मरण गर्दै फागुन १९ गते सरकारले झापा आन्दोलनका अग्रजलगायत निरङ्कुशतन्त्रविरुद्ध न्याय र समानताको आन्दोलनमा जीवनोत्सर्ग गर्ने योद्धालाई राज्यका तर्फबाट सहिदको विधिवत् सम्मान प्रदान गर्ने निर्णय गरेको छ । टिम्बुरबोटे, छिन्ताङ, पिस्कर लगायत विभिन्न घटनामा तत्कालीन शासकबाट कायरतापूर्वक हत्या गरिएका सहिदको पहिचान गरी राष्ट्रिय सम्मान प्रदान गर्न विशेष कार्यदल समेत गठन गरिएको छ ।
कार्यदलको प्रतिवेदनका आधारमा सहिदहरुलाई उच्च सम्मान गरिने विश्वास समेत पार्टीले व्यक्त गरेको छ ।

संविधानको प्रभावकारी कार्यान्वयन मार्फत आर्थिक–सामाजिक रूपान्तरणलाई तीव्र रूपले अगाडि बढाउँदै नेपाललाई समृद्ध र समुन्नत राष्ट्रका रूपमा स्थापित गर्न सक्नु नै सहिदप्रति साँचो श्रद्धाञ्जलि हुनेछ भन्दै प्रधानमन्त्री ओलीले नेपाली राजनीतिका पछिल्ला घटनाक्रमले सबैलाई मुलुकको सार्वभौमसत्ता, राष्ट्रियता, स्वाभिमान, राष्ट्रियहित, सामाजिक सद्भाव र आत्मनिर्भरताका निम्ति अझ बढी सजग, एकताबद्ध र क्रियाशील भएर अगाडि बढ्नुपर्ने शिक्षा दिएको बताए ।

वैचारिक स्पष्टता, सङ्गठनात्मक चुस्तता, कार्यशैलीगत स्वस्थता र व्यापक जनाधारयुक्त पार्टीको नेतृत्वमा मात्रै यी अभिभारा पूरा गर्न सम्भव भएको र पार्टीको काँधमा आएका ऐतिहासिक अभिभारा पूरा गर्न दृढ सङ्कल्पित हुँदै सहिदले देखाएको बाटामा अगाडि बढिरहने प्रतिबद्धता विज्ञप्तिमा व्यक्त गरिएको छ ।

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक :- मोहन काजी न्यौपाने
सम्पादक समूह :
अम्विका भण्डारी
अर्जुन कार्की
डाउनलोड गर्नुहोस्
हाम्रो फेसबुक पेज
%d bloggers like this:
%d bloggers like this: