मेची पुल उद्घाटन : छैसठ्ठी वर्षदेखिको सपना पूरा

  प्रकाशित मिति
१८ माघ २०७५, शुक्रबार १०:२६


भद्रपुर । बहुप्रतिक्षित मेची पुलको उद्घाटनपछि छैसठ्ठी वर्षदेखिको सपना पूरा भएको भन्दै भद्रपुरका राजनीतिज्ञ, उद्योगी, व्यवसायी र सर्वसाधारण हर्षित भएका छन् ।

प्रधानमन्त्री केपी ओलीले आज साँझ भद्रपुर–५ मा भारतको गलगलियासँग सीमा जोडिएको मेची पुलको उद्घाटन गरेका हुन् । धेरैपल्ट शिलान्यास भएको पुलका रुपमा पनि मेची पुल चर्चित छ ।

पञ्चायती कालमा यो पुलको निर्माणका लागि जनस्तरमा सङ्कलन गरिएको चन्दा रकम हिनामिना भएको विषयमा आन्दोलनसमेत भएको थियो । विसं २००९ मा भद्रपुरका सुरजमल अग्रवालको अध्यक्षतामा मेची पुल निर्माणका लागि पहिलोपल्ट समिति गठन भएको इतिहास पाइएको छ ।

प्रधानमन्त्री केपी ओलीले आज साँझ पुलको पश्चिमी मुखमा रिबन काटेर पुलको उद्घाटन गरे । हुलाकी राजमार्ग निर्माण परियोजनाले रु ३७ करोडको लागतमा मेची नदीमा ५६० मिटर लम्बाइ र ९.८ मिटर चौडाइ भएको पक्की पुलको निर्माण गरेको हो ।

‘लामो समयदेखि प्रतीक्षा गरिएको मेची पुलको निर्माण मेरो पनि सपना थियो’, प्रधानमन्त्री ओलीले उद्घाटन समारोहलाई सम्बोधन गर्दै भने, ‘विसं २०१९ तिर रेल हेर्नका लागि म यहीँबाट मेची खोला तरेर गलगलिया गएको थिएँ ।’

उनले पुलको पूर्वी भागसम्म भारतीय सडकलाई तत्काल जोड्नका लागि भारतीय प्रधानमन्त्री नरेन्द्रकुमार मोदीसँग अनुरोध गर्नेसमेत बताएका छन् । उनले अब आफूले जस्तो रेल हेर्नका लागि खोलो तरेर भारततिर जानु नपर्ने र आफ्नै कार्यकालमा पूर्वपश्चिम रेल दौडाउने सपना साकार पार्ने बताए ।

प्रधानमन्त्री ओलीले विगतका सरकारको ध्यान नगएर मेची पुल र हुलाकी राजमार्ग निर्माणमा पट्यारलाग्दो ढिलाइ भएको जनाउँदै अब भद्रपुरलाई आर्थिक केन्द्र बनाउन सरकारले सघाउने बताए ।

प्रदेशसभा सदस्य तथा नेपाल भारत मैत्री सङ्घका पूर्वअध्यक्ष ओमप्रकाश सरावगीले विसं २००९ मा मेची पुल बनाउनुपर्ने आवाज पहिलोपल्ट उठेको जानकारी दिए ।

उनले पुलको निर्माणपछि दक्षिणी झापाको विकासले काँचुली फेर्ने धारणा राख्दै भद्रपुरवासीले हसिलो अनुहार लगाउने र करतल ध्वनिले प्रधानमन्त्रीको स्वागत गर्ने अवसर भएको बताए ।

प्रदेश सांसद सरावगीका अनुसार विसं २०२४ मा तत्कालीन अञ्चलाधीश मनमोहन मिश्र, विसं २०४१ मा तत्कालीन प्रधानमन्त्री लोकेन्द्रबहादुर चन्द र विसं २०६६ मा तत्कालीन उपप्रधानमन्त्री विजयकुमार गच्छदारले पुलको शिलान्यास गरेका थिए ।

तीन जनाले तीन पटक शिलान्यास गरेको यो पुलको निर्माण कार्य भने पछिल्लोपटक प्रधानमन्त्री माधवकुमार नेपाल रहेका बेलामा तत्कालीन उपप्रधानमन्त्री गच्छदारले शिलान्यास गरेपश्चात् तीव्र गतिमा भएको पत्रकार गोपाल थिरी बताउँछन् ।

नेपाल चेम्बर अफ कमर्शको १ नं प्रदेशका अध्यक्ष राजेन्द्र घिमिरे मेची पुलको उद्घाटनलाई ऐतिहासिक खुशीको क्षण भएको बताएका छन् । कहिल्यै नबन्ने सपनाजस्तो भइसकेको थियो, मेची पुलको कथा चेम्बरका प्रदेश अध्यक्ष घिमिरे भन्छन्, ‘ढिलै नै भए पनि अब पुल बनेको छ, यो ऐतिहासिक क्षण हो ।’

झापा उद्योग सङ्घका अध्यक्ष टीकाराज ढकालले ‘मृत शहर’को उपमा पाएको भद्रपुर नगरले मेची पुलको उद्घाटनपश्चात् अब चोला फेर्ने आशा गरेका छन् ।

उनले पुलसँग हुलाकी राजमार्गलाई समेत द्रुत गतिमा निर्माण गर्न आवश्यक भएको औल्याउँदै हुलाकी मार्ग र मेची पुलका कारण भद्रपुरमा व्यापार–व्यवसाय फस्टाउने वातावरण बन्ने बताए ।

झापा जिल्ला समन्वय समितिका अध्यक्ष सोमनाथ पोर्तेल मेची पुलको उद्घाटन र चन्द्रगढी विमानस्थलमा रात्रिकालीन उडान शुरु भएको दिनलाई झापाको इतिहासमा सुनौलो अक्षरले लेखिने बताउँछन्  ।

उनले वर्तमान सरकार सुखी नेपाली र समृद्ध नेपालको अभियान लिएर अघि बढेको उल्लेख गर्दै मेची पुलको उद्घाटनले आर्थिक विकासको नयाँ ढोका खुलेको अनुभूति भएको बताए ।

भद्रपुर नगरपालिकाका नगर प्रमुख जीवनकुमार श्रेष्ठ १७ किलोमिटर नजीकको दूरीमा रहेको बङ्गलादेश जोड्ने व्यापारिक नाका सञ्चालनमा ल्याउन सके मेची पुलको महत्व अझ बढ्ने बताउँछन् ।

उनले पुलको सपना साँचेर ६५ वर्ष निराशपूर्वक बिताएका भद्रपुरवासीले मेची पुलको उद्घाटन भएपछि यहाँको आर्थिक र सामाजिक चहलपहल अभिवृद्धि हुने आशा राखेको बताए ।

भद्रपुरस्थित चन्द्रगढी विमानस्थलको रात्रिकालीन उडानसमेत आजैदेखि शुरु भएको प्रसङ्ग जोड्दै उहाँले भद्रपुरबाट बङ्गलादेशसम्म हवाई उडान सञ्चालन हुनुपर्ने आवश्यकता औँल्याएका छन् ।

पुल निर्माणले नेपालको पुरानो शहर भद्रपुरलाई भारतको सीमावर्ती बजार गलगलियालाई जोड्नेछ । पुल उद्घाटन भएता पनि भारततिर गलगलियासम्म जोड्ने सडकलाई पुलसँग जोड्न बाँकी भएको हुँदा पुल पूर्ण क्षमताका साथ सञ्चालन हुन अझै चुनौती छ ।

नेपाल चेम्बर अफ कमर्शका प्रदेश अध्यक्ष राजेन्द्र घिमिरे पुलको उद्घाटन नै भइसकेपछि पारिपट्टि कनेक्सन रोड निर्माणका लागि भारतलाई स्वतः दबाब पर्ने धारणा राख्छन् ।

हुलाकी राजमार्ग परियोजनाले जनाएअनुसार नवनिर्मित पुललाई हुलाकी राजमार्गको प्रस्थान विन्दु झापाचोकमा जोड्नका लागि नेपालतिर एक हजार ३०० मिटर फराकिलो सडक बनाउन रु चार करोड ४२ लाखमा ठेक्का लागिसकेको छ ।

पुल जोड्ने हुलाकी मार्गको सो भागमा परेका घर तथा जग्गाधनीले मुआब्जा नपाएको भन्दै असन्तुष्टि व्यक्त गरिरहेको नगरप्रमुख जीवनकुमार श्रेष्ठ बताउँछन् ।

भद्रपुर–५ का वडाध्यक्ष बन्धु कार्की नेपाल सरकारले सडक क्षेत्रमा रहेका घर तथा जग्गाहरुको मुआब्जा दिएर मेची पुलको सञ्चालन हुने वातावरण बनाउनुपर्ने बताउँछन् ।

उद्घाटन भएको मेची पुलबाट एक किलोमिटरको दूरीमै भारतको विहार राज्यको गलगलिया व्यापारिक केन्द्र रहेको छ । गलगिलयामा भन्सार, रेल्वे, बस टर्मिनल, बजार लगायतका सुविधा रहेको स्थानीय व्यवसायी रामकिसन यादव बताउँछन् ।

भद्रपुर नाकामा यसै वर्षदेखि छोटी भन्सारलाई स्तरोन्नति गरेर प्रमुख भन्सार स्थापना गरिएको हुँदा अब व्यापारिक गतिविधि बढ्ने आशा सबैले गरेका छन् ।

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक : अर्जुन कार्की
सम्पादक: अम्विका भण्डारी
डाउनलोड गर्नुहोस्
हाम्रो फेसबुक पेज
%d bloggers like this:
%d bloggers like this: