फक्सटनसँग गाँसियो मितेरी (फोटो फिचरसहित)

मोहन काजी / अर्जुन कार्की

मेचीनगर, २८ माघ । मेचीनगर नगरपालिका र बेलायतको फक्सटन टाउन काउन्सिलबीच मितेरी सम्बन्ध गाँसिएको छ ।

मेचीनगर नगरपालिकाको आफ्नै सभाहलमा सोमवार आयोजित एक समारोहमा दुबै नगरका मेयरले मितेरी सम्झौता पत्रमा हस्ताक्षर गरे ।

सम्झौता पत्रमा मेचीनगरका नगरप्रमुख बिमल आचार्य र फक्सटनका तर्फबाट मेयर जेकी मेडले हस्ताक्षर गरेका छन् ।

सङ्घीय सांसद् राम कार्की प्रमुख अतिथि रहेको सो कार्यक्रममा दुबै नगरका मेयरले सम्झौता पत्र आदानप्रदान समेत गरे ।

मितेरी सम्झौता हस्ताक्षर कार्यक्रममा सहभागी हुन बेलायतबाट मेयर जेकी मेडको नेतृत्वमा चार सदस्यीय प्रतिनिधिमण्डल आइतवार झापा आइपुगेको थियो ।

टोलीमा मितेरी सम्झौता गर्न फक्सटन काउन्सिलद्वारा गठित समितिका सेक्रेटरी नील जोन, फक्सटन उद्योग वाणिज्य सङ्घका अध्यक्ष

एवम् गोर्खा फाउन्डेसन बेलायतका दाता रे जोन्सन र फक्सटनका पूर्व काउन्सिलर एवम् गोर्खा फाउन्डेसन बेलायतका अध्यक्ष धनकिरण गुरुङ थिए ।

सम्झौता हस्ताक्षरको ऐतिहासिक अवसरमा मेचीनगरका प्रथम नगरप्रमुख एवम् संविधानसभा सदस्य रविन कोइराला र फक्सटनका पूर्व काउन्सिलर धनकिरण गुरुङलाई साक्षी राखिएको थियो ।

गुरुङ फक्सटनको काउन्सिलर भएका बेला मेचीनगरका तत्कालीन नगरप्रमुख कोइरालाले फक्सटनसँग मितेरी सम्बन्धको पहिलो प्रस्ताव गरेका थिए । सो प्रस्तावलाई मेचीनगर घर भई बेलायती गौर्खा सेनामा कार्यरत रहिसकेका गुरुङले निरन्तरको प्रयासमा सफल तुल्याएका हुन् ।

समारोहमा सङ्घीय सांसद राम कार्की, संविधानसभा सदस्य रविन कोइराला, संविधानसभा सदस्य उषा गुरुङ, जिल्ला समन्वय समिति झापाका प्रमुख सोमनाथ पोर्तेल, मेचीनगरका प्रमुख विमल आचार्य, फक्सटन काउन्सिलकी मेयर जेकी मेड, भद्रपुर नगरपालिकाका प्रमुख जीवनकुमार श्रेष्ठ, मेचीनगर नगरपालिकाकी उपप्रमुख मीना उप्रेती, फक्सटन उद्योग वाणिज्य सङ्घका अध्यक्ष रे जोन्सन र फक्सटनका पूर्व काउन्सिलर धनकिरण गुरुङले मन्तब्य ब्यक्त गरेका थिए ।

मेचीनगर प्रमुख आचार्य र फक्सटनकी मेयर मेडको संयुक्त अध्यक्षतामा भएको कार्यक्रममा मेचीनगर उपप्रमुख उप्रेतीले स्वागत मन्तब्य र फक्सटनका पूर्व काउन्सिलर गुरुङले धन्यवाद ज्ञापन गरेका थिए । मेचीनगरका सामुदायिक अधिकृत अनन्त वस्तीले कार्यक्रमको सञ्चालन गरेका थिए ।

सम्झौता पत्रको अङ्ग्रेजी संस्करण फक्सटनका पूर्व काउन्सिलर धनकिरण गुरुङ र नेपाली संस्करण मेचीनगरका प्रमुख प्रशासकीय अधिकृत महेन्द्र खाम्याहाङले बाचन गरेका थिए ।

सम्झौतामा हस्ताक्षर गर्न आएकी फक्सटनकी मेयर मेड र उनको टोलीलाई सोमवार मेचीनगर नगरपालिकामा भब्य स्वागत सम्मान गरिएको थियो ।

स्वागतका लागि सङ्घीय सांसद् राम कार्की, संविधानसभा सदस्यद्वय रविन कोइराला र उषा गुरुङ, प्रदेश सांसद्द्वय श्रीप्रसाद मैनाली र राधा थापा, मेचीनगर प्रमुख विमल आचार्य, उपप्रमुख मीना उप्रेती, प्रमुख प्रशासकीय अधिकृत महेन्द्र खाम्याहाङ, भद्रपुर नगरपालिकाका प्रमुख जीवनकुमार श्रेष्ठ, प्रमुख जिल्ला अधिकारी उदयबहादुर राना, प्रहरी उपरीक्षक कृष्णप्रसाद कोइराला, नेपाली सेनाको चारआली व्यारेकका कर्णेल मुक्साङ याक्थुम्बा, सीमा सुरक्षा वल चन्द्रगढीका सशस्त्र प्रहरी नायव उपरीक्षक द्रोणविक्रम शाह उपस्थित थिए ।

नगरपालिकाको मूलगेटदेखि सभाहलसम्म बाटोमा दुबैतिर हातमा नेपाल र बेलायतको झण्डा बोकेर उभिएका सर्वसाधारण, विद्यार्थी र जातीय भेषभूषामा सजिएकाहरुले फक्सटनबाट आएको पाहुना टोलीलाई स्वागत अभिवादन गरेको थियो । लाखे नाच, मेचे नाच, सन्थाल नाच र मुण्डा नाच पनि पाहुनालाई देखाइएको थियो ।
………………………………

गोर्खालीको घर आएकी छु : मेयर मेड

ईटाभट्टा । फक्सटन टाउन काउन्सिलकी मेयर जेकी मेडले मेचीनगर आउँदा आफुलाई गोर्खाहरुको सहरबाट गोर्खालीको घर आएको अनुभूति भएको बताएकी छन् ।

मेचीनगरसँग मितेरी सम्झौतामा हस्ताक्षर गरिसकेपछि सम्बोधन गर्दै उनले फक्सटनलाई गोर्खाहरुको सहर र मेचीनगरलाई घर बताएकी हुन् ।

‘बेलायतको सेवा गर्न आफ्ना छोराछोरीहरुलाई पठाइदिनु भएको छ’, नेपाली भाषामा नमस्ते भनेर सम्बोधन सुरु गरेकी मेयर मेडले अङ्ग्रेजी भाषणमा भनिन्, ‘गोर्खा सैनिकको सेवाप्रति बेलायतको सरकार तपाईहरुसँग आभारी छ ।’

मेचीनगरको भ्रमण जीवनकै अबिस्मरणीय रहेको र स्वागत अभिवादन न्यानो महसुस भएको बताउँदै उनले फक्सटनले गोर्खा फाउन्डेसन र युके झापाली समाजमार्फत विभिन्न सहयोग पुर्याउने आश्वासन दिइन् ।

काँकरभिट्टा माध्यमिक विद्यालयमा गोर्खा फाउन्डेसनको सहयोगमा सञ्चालित कम्प्युटर ल्यावमा अध्ययन गर्ने केही विद्यार्थीलाई उच्च प्रविधि सम्बन्धी अध्ययनका लागि र झापाका ५ जनासम्म प्रहरीलाई सुरक्षासम्बन्धी तालिमका लागि बेलायत लैजाने मेयर मेडले घोषणा गरेकी छन् ।

सन् २०२१ मा विद्यार्थी र प्रहरीलाई बेलायत लगेर तालिमको व्यवस्था फक्सटनले मिलाउने उनको भनाई थियो । यही अप्रिल महिनामा फक्सटनका डेपुटी मेयर मेचीनगरको भ्रमणमा आउने र त्यसबेला मेचीनगरको विकासमा सघाउन सकिने योजनाहरुको अध्ययन गरिने उनले जानकारी दिइन् ।

……………………..

विकासमा साझेदारी गर्नेछौं : नगरप्रमुख आचार्य

ईटाभट्टा । मेचीनगरका नगरप्रमुख विमल आचार्यले मितेरी साइनो गाँसिए पछि फक्सटनसँग विकासमा साझेदारी हुने विश्वास व्यक्त गरेका छन् ।

सम्झौता हस्ताक्षर समारोहमा बोल्दै नगरप्रमुख आचार्यले मितेरी साइनो अहिले भर्खर गाँसिएको देखिए तापनि यसको सुरुवात प्रथम नगरप्रमुख रविन कोइरालाको पालादेखि भएको जानकारी दिए ।

‘रविनसरको पालादेखिको सपना थियो यो’, नगरप्रमुख आचार्यले भने, ‘पूर्व काउन्सिलर धनकिरण गुरुङको सार्थक पहलले बल्ल आज त्यो सपना साकार भएको छ ।’

मेचीनगरकी उपप्रमुख मीना उप्रेतीले कार्यक्रममा स्वागत मन्तब्य राख्दै दुबै नगरको भौगोलिक अवस्था उस्तैउस्तै रहेको बताइन् ।

उनले मेचीनगरको निम्तोलाई स्वीकार गर्दै भ्रमणमा आउने फक्सटनको टोलीप्रति विशेष आभार व्यक्त गरेकी थिइन् ।

कार्यक्रममा सङ्घीय सांसद् राम कार्कीले नेपालले अन्तर्राष्ट्रि«य सम्बन्धको इतिहासमा पहिलो दौत्य सम्बन्ध बेलायतसँग नै गाँसेको स्मरण गरेका थिए ।

संविधासभा सदस्य रविन कोइरालाले आफुले थालेको एउटा महत्वपूर्ण कदमले साकार स्वरुप पाउँदा हर्ष लागेको बताउँदै मितेरी सम्झौता भएको दिन ऐतिहासिक रहेको धारणा व्यक्त गरे ।

अर्की संविधानसभा सदस्य उषा गुरुङले जोहोना लुम्ले मेचीनगर आएको स्मरण गर्दै मितेरी सम्बन्धले मेचीनगर र फक्सटनबीच साझेदारीको नयाँ अध्याय सुरु भएको हेर्न चाहेको बताइन् ।

जिसस प्रमुख सोमनाथ पोर्तेलले मितेरी सम्बन्ध ऐतिहासिक भएको बताउँदै सहयोग आदानप्रदान एकतर्फी नहोस् भन्ने सुझाव व्यक्त गरे ।

भद्रपुरका नगरप्रमुख जीवनकुमार श्रेष्ठले मेचीनगरले फक्सटनसँग गाँसेको मितेरी साइनो झ्याङ्गिएर जाओस् भन्ने शुभकामना दिए ।

मितेरी सम्बन्ध गाँस्न सूत्राधारको भूमिकामा रहेका मेचीनगरबासी एवम् फक्सटनका पूर्व काउन्सिलर धनकिरण गुरुङले लामो कसरतका बाबजुत ६ हजार माइल टाढाको फक्सटनसँग मितेरी गाँसिएको बताए ।

उनले मेचीनगरका प्रथम नगरप्रमुख रविन कोइरालाले राखेको मितेरी प्रस्ताव बोकेर १२ वर्ष अघि बेलायत गएको स्मरण सुनाउँदै कोइरालाको कार्यकालपश्चात नेपालको द्वन्द्वकालीन अवस्था एवम् जनताले चुनेको नगरप्रमुखको अभावका कारण मितेरी सम्बन्धले मूर्त रुप लिन यतिको ढिला भएको बताए ।

कार्यक्रममा नेपाली काङ्ग्रेस झापाका उपसभापति एवम् तत्कालीन धुलावारी गाउँ विकास समितिका अध्यक्ष राम कट्टेल, नेपाली काङ्ग्रेस झापा क्षेत्र नं. १ का सभापति मणिकुमार उप्रेती, आदिवासी जनजाति महिला महासङ्घ झापाकी अध्यक्ष माया गुरुङ लगायतको उपस्थिति रहेको थियो ।

महासङ्घकी अध्यक्ष गुरुङले मेचीनगरको नागरिकहरुका तर्फबाट फक्सटनकी मेयर जेकी मेड र पाहुना टोलीलाई नेपाली टोपी तथा खादा पहिर्याएर सम्मान गरेकी थिइन् ।

 

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक :- मोहन काजी न्यौपाने
सम्पादक समूह :
अम्विका भण्डारी
अर्जुन कार्की
हाम्रो फेसबुक पेज
%d bloggers like this:
%d bloggers like this: