मेयर आचार्य सिलिगुढीको किन्स हस्पिटलमा भर्ना

  प्रकाशित मिति
११ कार्तिक २०७७, मंगलवार २१:३२


मेचीनगर, ११ कार्तिक । मेचीनगरका नगरप्रमुख विमल आचार्यलाई कोरोना संक्रमणको थप उपचारका लागि भारतको सिलिगुढीको हिलकार्ट रोडस्थित किन्स हस्पिटलमा भर्ना गरिएको छ ।

विगत १६ दिनदेखि कोरोना संक्रमित आचार्यको स्वास्थ्यमा उल्लेखनीय सुधार नआएपछि आज साँझ विराटनगरको नोेवेल मेडिकल कलेजबाट रिफर लिएर सिलिगुढी लगिएको हो ।

सिलिगुढीको सुविधासम्पन्न हस्पिटल किन्समा आचार्यलाई उपचारका लागि भर्ना गर्न परिवारका सदस्यहरु मात्र गएका छन् ।

नगरपालिकाका प्रेस सल्लाहकार लक्ष्मी उप्रेतीले सामाजिक सञ्जालमार्फत आचार्यलाई सिलिगुढी उपचारका लागि लगिएको पुष्टि गरेका छन् ।

सल्लाहकार उप्रेतीले नगरप्रमुखको स्वास्थ्य अवस्था सामान्य रहेको र आत्तिन नपर्ने संकेत गरेका छन् ।

मेयर आचार्यलाई मेचीनगर नगरपालिकाको मे १ झ १३८ नं. को एम्बुलेन्सले सिलिगुढी लगेको हो ।

काँकरभिटटाबाट मेचीनगर वडा नं. ४ का वडाध्यक्ष नविन बराललगायतले उनलाई पानीटंकी भारतसम्म पुरयाएको सल्लाहकार उप्रेतीले जानकारी दिए । मेयरकी पत्नी गीता आचार्य र भाइ सन्तोष आचार्य पनि सिलिगुढी पुगेका छन् ।

कोरोनासँग १६ दिनदेखि जुधिरहेका नगरप्रमुख आचार्यको स्वास्थ्य अवस्थाका बारेमा नगरपालिकाका तर्फबाट कुनै औपचारिक जानकारी नगरवासीलाई गराइएको छैन ।

सामान्य अवस्था हो भने किन भारत नै लैजानु पर्ने अवस्था आयो भनी नगरका प्रेस सल्लाहकार उप्रेतीको फेसबुक स्टाटसमा कमेन्टमार्फत नगरवासीले प्रश्न गरेका छन् ।

काँकरभिट्टाबाट आचार्य भारत प्रस्थान गर्नु अघि एम्बुलेन्समा खिचिएको तस्वीर सार्वजनिक भएको छ । त्यस फोटोमा आचार्यको कमजोर बनेको स्वास्थ्य प्रष्टै झल्किएको छ ।

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक :- मोहन काजी न्यौपाने
सम्पादक समूह :
अम्विका भण्डारी
अर्जुन कार्की
हाम्रो फेसबुक पेज