समाजसेवी प्रसाईलाई उत्कृष्ट नारी सम्मान

  प्रकाशित मिति
२३ फाल्गुन २०७७, आईतवार १९:१९


झापा, २३ फागुन । वीरता लेडी जेसीजसहित झापाका पैतिस वटा विभिन्न सामाजिक संस्थाले सामूहिक रुपमा समाजसेवी तथा राजनीतिज्ञ गिरीराजकुमारी प्रसाईंलाई उत्कृष्ट नारी सम्मान प्रदान गरेका छन् ।

वीरता लेडी जेसीजले पहिलो पटक उत्कृष्ट नारी सम्मान कार्यक्रमको घोषणा गरी १११औं अन्तर्राष्ट्रिय नारी दिवसको अवसरमा आइतबार प्रसाईंलाई उत्कृष्ट नारी सम्मान प्रदान गरेको हो ।

समाज सेवामार्फत सामाजिक रुपान्तरणमा टेवा पुर्याएको भन्दै बिर्तामोड– ५ देवीवस्ती निवासी ९० वर्षीया प्रसाईंलाई उक्त सम्मान प्रदान गरिएको हो । वीरता लेडी जेसीज पूर्व अध्यक्षहरुको अगुवाईमा भएको कार्यक्रममा वीरता लेडी जेसीजले प्रसाईंलाई पदक तथा सम्मान पत्र प्रदान गरेको थियो । ३५ वटा संस्थाको तर्फबाट संयुक्त रुपमा एउटै सम्मान पत्र हस्तान्तरण गरिएको थियो ।

उत्कृष्ट नारी सम्मान छनौट समितिको तर्फबाट संयोजक नारी सञ्चार गृह झापाकी अध्यक्ष भीमा शिवाकोटीले २०७७ को उत्कृष्ट नारीको रुपमा प्रसाईंको नाम घोषणा गरेकी थिइन् । उत्कृष्ट नारी सम्मान छनौट समितिमा सञ्चारकर्मी कुमार भट्टराई र वीरता जेसीजका पूर्व अध्यक्ष शिवकुमार अग्रवाल सदस्य रहेका छन् ।

उत्कृष्ट नारी सम्मान कार्यक्रमकी संयोजक वीरता लेडी जेसीजकी संस्थापक अध्यक्ष शारदा रिजालको अध्यक्षता तथा बिर्तामोड नगरपालिकाकी उपमेयर पवित्रा महतारा प्रसाईंको प्रमुख आतिथ्यमा भएको कार्यक्रममा वीरता लेडी जेसीजकी पूर्व अध्यक्ष देवी भण्डारीले स्वागत गरेकी थिइन् । कार्यक्रममा प्रमुख अतिथि पवित्रा महतारा प्रसाईं, सम्मानित व्यक्तिको तर्फबाट बुहारी संगीता प्रसाईं र वीरता जेसीजका पूर्व अध्यक्ष राजकुमार पोखरेल लगायतले बोलेका थिए ।

कार्यक्रममा वीरता लेडी जेसीजकी अध्यक्ष स्वस्तिका आचार्य सिटौलाले विभिन्न फरक–फरक विधामा सक्रिय महिलालाई उत्कृष्ट नारी घोषणा गरी प्रत्येक वर्षको अन्तर्राष्ट्रिय नारी दिवसमा उत्कृष्ट नारी सम्मान गरिने जानकारी दिइन् ।

कार्यक्रममा वीरता लेडी जेसीजकी पूर्व अध्यक्ष कञ्चना ढकाल सिटौलाले आस्था वाचन गरेकी थिइन् भने उत्कृष्ट नारी सम्मानको औचित्यमाथि पूर्व अध्यक्ष राधा सुव्वाले प्रकाश पारेकी थिइन् । कार्यक्रम सकिए लगत्तै स्कटिङ्सहित उत्कृष्ट नारी प्रसाईं, छोरा विवेककेशरी प्रसाईं र बुहारी संगीता प्रसाईंलाई बिर्तामोड नगर परिक्रमासहित बिर्तामोड–५ देवीवस्तीस्थित निवास पुर्याइएको थियो ।

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक :- मोहन काजी न्यौपाने
सम्पादक समूह :
अम्विका भण्डारी
अर्जुन कार्की
हाम्रो फेसबुक पेज