झापाको तीन पालिकामा राप्रपाको नेतृत्व सम्हाल्दै महिला

  प्रकाशित मिति
१६ बैशाख २०७८, बिहीबार ०७:४०


झापा, १६ वैशाख । राजनीतिक दलको नेतृत्व तहमा महिलाको सहभागिता न्यून भएको गुनासो बढिरहेको बेला झापाको तीन प्रमुख नगरमा राष्ट्रिय प्रजातन्त्र पार्टीको नगर अध्यक्षमा महिला निर्वाचित भएका छन् ।
राष्ट्रिय प्रजातन्त्र पार्टीको नवनिर्वाचित झापा जिल्ला अध्यक्ष केशव ओझाका अनुसार मेचीनगर, विर्तामोड र भद्रपुर नगर समितिको अध्यक्षमा क्रमशः सबिना बजगाई, रञ्जु प्याकुरेल र राधा कार्की चयन भएकी हुन् ।

‘अरु राजनीतिक दलहरु भाषण र कागजमा मात्र समावेशीका कुरा गर्छन्,’ अध्यक्ष ओझाले भने–‘हामीले व्यवहारमै पार्टीमा महिलालाई नेतृत्व तहमा पुर्याएका छौं ।’ हरेक समितिमा ३३ प्रतिशतभन्दा ज्यादा महिलाको सहभागिता सुनिश्चित गरिएको उनले बताए ।

राष्ट्रिय प्रजातन्त्र पार्टी आगामी महाधिवेशनका लागि पालिका तहसम्मै सङ्गठनलाई पुनर्गठन र बलियो बनाउने अभियानमा लागिरहेको उनले बताए । यसअघि ती तिनवटै नगरमा पार्टीको नगर समितिको अध्यक्ष पदमा पुरुष थिए ।

मुलुकभरमा सो पार्टीले प्रतिनिधिसभाको गत निर्वाचनमा झापाबाटै मात्र एक सिट जितेको थियो । झापा निर्वाचन क्षेत्र नं. ३ बाट राजेन्द्र लिङ्देन प्रतिनिधिसभा सदस्य छन् । झापामा सो पार्टीले गत स्थानीय तहको निर्वाचनमा कचनकबल, हल्दिबारी र गौरीगञ्ज गरी तीन वटा पालिकाको अध्यक्ष पद जितेको थियो ।

पुरुषहरुसँगको प्रतिष्पर्धाबाटै आफु पार्टी नेतृत्वका लागि निर्वाचित भएर आएको मेचीनगरकी राप्रपा अध्यक्ष सबिना बजगाईले बताइन् । पार्टीको नेतृत्व तहमा आउन उनले अरु महिलालाई समेत आह्वान गरेकी छन् ।

‘महिलाले इमान्दार र कुशलतापूर्वक पार्टीको नेतृत्व गर्छन् भन्ने विश्वासका साथ मलाई अधिवेशनबाट चयन गरिएको हो,’ उनले अनुभव समेत सुनाउँदै भनिन्–‘म पहिलेदेखि नै सामाजिक सेवाको क्षेत्रमा अग्रपङ्तिमा रहेर काम गरिरहेको र पार्टीको पनि पहिलो पङ्तिमै बसिसकेको हुँदा नगर अध्यक्षको जिम्मेवारी सम्हाल्न गाह्रो लागेको छैन ।’

गत स्थानीय निर्वाचनमा बजगाई मेचीनगरको र कार्की भद्रपुर नगरपालिकाको उपप्रमुख पदमा उम्मेद्वार थिइन् । प्याकुरेल विर्तामोडको नगर सदस्यमा पदमा उम्मेद्वार थिइन् ।

जनसङ्ख्याको आधाभन्दा बढी हिस्सा महिलाले ओगटेको हुँदा महिला नै अध्यक्ष हुँदा सङ्गठन विस्तारमा सघाउ पुग्ने राप्रपा विर्तामोडकी नवनिर्वाचित अध्यक्ष रञ्जु प्याकुरेल बताउँछिन् ।

‘आफ्नो पार्टीलाई अरुभन्दा अब्बल र जनमुखी बनाउने लक्ष्य लिएकी छु,’ प्याकुरेल भन्छिन्–‘हिन्दु राज्य र संबैधानिक राजसंस्था पार्टीको मुख्य एजेन्डा हो, यी कुरा जनतालाई बुझाउन अब हामी घरघर पुग्छौं ।’

गणतन्त्रमा समान अधिकारको कुरा आए तापनि नेपाली महिलाले अझैसम्म चुलोचौकामै सीमित हुनुपरेको बेला राप्रपाले तीन वटा नगरपालिकामा पार्टीको अध्यक्ष पदमा महिलालाई नै पुर्याउनु उदाहरणीय भएको राप्रपाकी केन्द्रीय सदस्य माया गुरुङ बताउँछिन् ।

‘म पञ्चायतकालमै उपप्रधानपञ्च निर्वाचित भइसकेको व्यक्ति हुँ,’ पार्टीकी केन्द्रीय सदस्य गुरुङले भनिन्–‘आजको युगमा महिलाले पुरुषको शासनमा खुम्चिएर बस्नु हुँदैन । हरेक पार्टीको अध्यक्ष मात्र होइन, स्थानीय तहको प्रमुख पदमै अब महिलालाई पुर्याउनु जरुरी छ ।’

प्रतिक्रिया दिनुहोस्

सम्पर्क

   मेचीनगर–१०,झापा, नेपाल
   023-561466
   9852673623
    [email protected]

हाम्रो बारेमा

प्रधान सम्पादक :- मोहन काजी न्यौपाने
सम्पादक समूह :
अम्विका भण्डारी
अर्जुन कार्की
हाम्रो फेसबुक पेज