६ मंसिर २०८१, बिहिवार
पाँचथर, २० पुस । पाँचथरको फिदिम नगरपालिका–८ घुमाउनेटारको एक घरमा लागेको आगोमा जलेर दुई जनाको मृत्यु भएको छ ।
मेखबहादुर गुरुङको घरमा गएराति साढे १ बजे आगलागी हुँदा मेखबहादुरका २२ वर्षीया छोरी ममता गुरुङ र २३ वर्षीया बुहारी आसाङसिंह थेबेको ज्यान गएको जिल्ला प्रहरी कार्यालय पाँचथरका डिएसपी हरि खतिवडाले जानकारी दिनुभयो ।
आगोमा जलेर ५५ वर्षीय मेखबहादुर गुरुङ र उहाँका छोरा विजेन्द्र घाइते हुनुभएको छ । उहाँहरुको अवस्था सामान्य छ । उहाँहरुको टाउको, हात र खुट्टामा आगोले पोलेको छ ।
उक्त घरमा ७ जना सुतेकोमा २ जनाको मृत्यु भएको, दुई जना घाइते भएको र तीन जना भागेर ज्यान जोगाउन सफल भएको डिएसपी खतिवडाले जानकारी दिनुभयो ।
आगो लागेर टिनको छानो भएको तीन तले घर पूर्णरुपमा क्षतिग्रस्त भएको छ । आगलागीको कारण खुलेको छैन । यद्यपि बिजुलीको लाइन सर्ट भएर आगो लागेको हुनसक्ने अनुमान प्रहरीले गरेको छ ।
आगो लागेको जानकारी १ बजेर ५५ मिनेटमा पाउनासाथ अस्थायी प्रहरी चौकी तमाखे रानीटारबाट प्रहरी सहायक निरीक्षक रोशन श्रेष्ठको कमाण्डमा ५ जनाको टोली गएको थियो । थप सहयोगका लागि जिल्ला प्रहरी कार्यालय फिदिमबाट प्रहरी नायब उपरीक्षक हरि खतिवडाको कमाण्डमा २५ जनाको टोली दुई वटा दमकल सहित गएको थियो । राति साढे १ बजे लागेको आगो आज बिहान सवा ४ बजे पूर्णरूपमा नियन्त्रणमा लिइएको थियो ।
घटनास्थल अस्थायी प्रहरी चौकी तमाखे रानीटारबाट अन्दाजी ९ किलोमिटर उत्तर र जिल्ला प्रहरी कार्यालय पाँचथरबाट अन्दाजी २५ किलोमिटर पूर्वमा पर्दछ ।
