१५ वैशाख २०८१, शनिवार
मेचीनगर, २६ माघ । झापाको पाउँ पाथिभरा मन्दिर व्यवस्थापनले कार्यालय सचिव प्रतिष्पर्धाबाट नियुक्त गर्ने भएको छ ।
पाउँ पाथिभरा उत्तरगंगा पर्यटन तथा प्रवर्धन समितिले हालै कार्यालय सचिव पदको विज्ञापन प्रकाशित गर्दै दरखास्त आह्वान गरेको हो ।
मन्दिरको कार्यालय सञ्चालन र लेखा राख्न कार्यालय सचिवको आवश्यकता परेको समितिका सचिव यमनाथ बरालले बताउनुभयो ।
त्यस्तो आवेदकले व्यवस्थापन संकायमा कक्षा १२ पास गरेको हुनुपर्ने र फागुन २ गतेसम्ममा निवेदन दर्ता गराइसक्नु पर्ने बताइएको छ ।
नियुक्त हुने कार्यालय सचिवले सफ्टवेयरको माध्यमबाट हिसाबकिताब राख्नुपर्ने र प्रशासनिक जिम्मेवारी सम्हाल्नु पर्ने बरालले बताउनुभयो ।
पाउँ पाथिभरा मन्दिर एक दशक अघि स्थापना भएको हो । मन्दिरमा हाल दर्शनार्थी र भक्तजनको घुइँचो लाग्ने गरेको छ ।
मन्दिरको आम्दानी पछिल्लो समय बढेको बताइएको छ भने कार्यालयलाई पूजारी र समितिका पदाधिकारी आफैले मात्र व्यवस्थापन गर्न पर्याप्त छैन । तसर्थ, समितिले मन्दिरलाई थप पारदर्शी र व्यवस्थापन गर्न प्रयास गरेको रुपमा यो कदमलाई बुझ्न थालिएको छ ।
