नारी सञ्चार गृह झापाकी अध्यक्ष तथा प्रेस चौतारी नेपालकी केन्द्रीय सदस्य भीमा शिवाकोटी पत्रकारितासँगै सामाजिक क्षेत्रको कार्यमा जिल्लामा अग्रणी भूमिकामा रहनु भएकी एउटी सशक्त महिलाको रुपमा परिचित हुनुहुन्छ । रेडियो कञ्चनजंघाबाट पत्रकारिताको सुरुवात गर्नुभएकी शिवाकोटी पछिल्लो समय विभिन्न पत्रपत्रिका र अनलाइनमा राम्रो लेखकका रुपमा पनि परिचित हुनुहुन्छ । पढौ हरेक पार्टी र संगठनको नेतृत्वमा बस्ने नेताको रबैयाविरुद्ध शिवाकोटीले तयार गरेको कविता-
मलाई त शंकै छ
-भीमा शिवाकोटी
ए....नेता
तिमीसंग कति धेरै आक्रोश छ
तिम्रै कारण हाम्रो संगठन थोत्रो हँदैछ
के तिमी शासक या प्रशासक हौ ?
या तिमी हाम्रो रक्षक हौ ?
मलाई त शंकै छ ।
तिम्रो प्रस्तुति हेरिरहँदा लाग्छ तिमी प्रशासक हौ
त्यसैले त तिमी सबैको मुखमा मिनरल वाटर पिलाउन उद्धत छौ
आफ्नै कुरा मात्र सुनाउन चाहन्छौ
तर तिम्रो चर्को आवाज पनि माइक्रो फोनमै सीमित छ
खै के संगठन सुदृढ होला र
मलाई त शंकै छ ।
तिमी बोलिरहन्छौ हामी सुनिरहन्छौं
दोहोरो संवादको खिलाफमा तिमी नै हुन्छौ
अनि चहाना राख्छौ संगठन सुदृढ़ीकरणको
एकहोरो संवादले संगठन सुदृढ होला के ?
मलाई त शंकै छ ।
न बैठकका एजेन्डाहरू बुझिन्छ
नत तिम्रो बोली नै बुझ्ने गरी सुनिन्छ
संगठन सुदृढ म कसरी बनाऊ नेताज्यू
तिम्रो आक्रोशित आवाज मात्र स्टेजबाट गुन्जिन्छ
खै संगठन सुदृढ होला के
मलाई त शंकै छ ।
तिम्रो सोच त्रेतायुगकै छ,अरूलाई नयाँ सोच राख भन्छौ
आफु मात्र संगठनको ठूलो मान्छे अरू सबलाई भुरा ठान्छौ
तिमी बोल्छौ मात्रै बोलेको कार्यान्वयन गर्दैनौ
म कुन शब्दले सम्मान गरौ नेताज्यू
तिम्रो हरेक कुरामा सहमति नराख्नेलाई कामै नलाग्ने भन्दैछौ
खै संगठन सुदृढ होला के
मलाई त शंकै छ ।