१२ पुष २०८१, शुक्रवार
हल्दिबारी, १७ चैत । हल्दिबारी वडा नं. ३ की सामाजिक अभियन्ता ईश्वरा तिवारी र खड्ग तिवारीले १० लाख रुपैयाँ मूल्यको एक कठ्ठा जग्गा बाल संस्कार केन्द्र सञ्चालनका लागि दान गर्नुभएको छ ।
तिवारी दम्पत्तिले सो जग्गा जनकल्याण प्रतिष्ठान एकल विद्यालय अभियान नेपाललाई दान गर्नुभएको हो ।
जग्गादातालाई प्रतिष्ठानले आज एक कार्यक्रमबीच हल्दिबारीको पाराखोपीमासम्मान गर्यो ।
दाता परिवारलाई फुलमाला र अबिर लगाएर हल्दिबारी–३ का वडाध्यक्ष हरिप्रसाद ओली, अभियानका झापा अध्यक्ष शंकर भट्टराई र विश्व हिन्दू परिषद् झापाका अध्यक्ष होमनाथ ढुंगेलले सम्मान गर्नुभयो ।
प्रतिष्ठानका अध्यक्ष भट्टराईले प्रदेशमै पहिलोपल्ट बाल संस्कार केन्द्रका लागि जग्गा प्राप्त भएको भन्दै खुशी व्यक्त गर्नुभयो ।
प्रतिष्ठानले झापाका २५ स्थानमा हिन्दू धर्म, संस्कार र नैतिक शिक्षा प्रदान गर्ने बाल संस्कार केन्द्र सञ्चालन गर्दै आएको भट्टराईले जानकारी दिनुभयो ।
अभियन्त पं. सोमनाथ सुबेदीले बाल संस्कार केन्द्र ६४ जिल्लामा सञ्चालन भइरहेको बताउनुभयो ।
समाजसेवी सत्येन्द्र कर्णले स्वागत गर्नुभएको सो अवसरमा पिताम्बर बराल, शिवप्रसाद दाहाल, भरत मैनाली, खिनामाया खनाल, मित्रलाल ढुंगाना लगायतको उपस्थिति रहेको थियो ।
अर्जुनधारामा अन्तरक्रिया
अर्जुनधारा वडा नं. ६ मा स्थानीय अभिभावकहरुसँग जनकल्याण प्रतिष्ठान एकल विद्यालय अभियानले आज अन्तरक्रिया सम्पन्न गरेको छ ।
सो वडाका अध्यक्ष हरिश्चन्द्र बाँस्तोलाले अभियानको सोच र कार्यक्रम समाजका लागि अति उपयोगी भएको जनाउँदै बालबालिकाहरुलाई असल संस्कार सिकाउने अभियानमा आफ्नो सँधै सहयोग रहने बताउनुभयो ।
अर्जुनधारा– ६ मा झापा र इलामका एकल विद्यालयका आचार्यहरुको सात दिने बर्गभेला चैत २१ गतेदेखि आयोजना हुने बताउँदै उहाँले त्यसमा सहयोग पुर्याउन आग्रह गर्नुभयो ।
