९ मंसिर २०८१, आइतवार
मेचीनगर,
१ साउन । मेची भन्सार कार्यालयले गत आर्थिक वर्षको
तुलनामा आव २०७९/०८०
मा साढे तीन अर्ब रुपैयाँ कम राजस्व असुली
गरेको छ ।
कार्यालयले आव २०७९/०८० मा १४ अर्ब चार करोड ७५ लाख ३९ हजार रुपैयाँ राजस्व संकलन गरेको प्रमुख भन्सार अधिकृत रामप्रसाद रेग्मीले बताउनुभयो ।
जबकि, आव आव २०७८/०७९ मा मेची भन्सारले १७ अर्ब ५३ करोड १९ लाख २८ हजार रुपैयाँ राजस्व असुली गरेको थियो ।
आव २०७८/०७९ को तुलनामा आव २०७९/०८० मा राजस्व संकलनमा तीन अर्ब ४८ करोड ४३ लाख ८९ हजार रुपैयाँले कमी आएको छ ।
लक्ष्यमा पनि चुक्यो मेची भन्सार
मेची भन्सार कार्यालय भन्सार असुलीका लागि आफैले राखेको लक्ष्य प्राप्तिमा नराम्ररी चुकेको छ ।
भन्सारले आव २०७९/०८० मा २० अर्ब २४ करोड १८ लाख ३३ हजार रुपैयाँ राजस्व संकलनको लक्ष्य लिएको थियो ।
लक्ष्यको तुलनामा मेची भन्सारले छ अर्ब १९ करोड ४२ लाख ९४ हजार रुपैयाँ कम राजस्व असुलेको हो । लक्ष्यको तुलनामा यो असुलीको प्रगति ६९ दशमलब ४१ प्रतिशत मात्र हो ।
किन घट्यो राजस्व
भन्सारमा राजस्व घट्नुका केही कारणहरु रहेको जानकारहरु बताउँछन् ।
पहिलो कुरा त मुलुक आर्थिक मन्दीबाट गुज्रिरहेको छ । व्यापार सुस्त भएको छ । यस्तो अवस्थामा आयात र निर्यात दुबै खालका व्यापारमा कमी आउँछ । अहिले भन्सारमा राजस्व घट्नुमा यो मुख्य कारण हो ।
दोस्रो कारण तस्करी (अबैध व्यापार) पनि हो । नाका छलेर तस्करी गतिविधि बढ्दा भन्सारमा राजस्व तिरेर सामान आयात निर्यात गर्न आउनेको संख्या घट्छ ।
पछिल्लो समय काँकरभिट्टाको उत्तरी र दक्षिणी विभिन्न गौडाहरुबाट ठूलो मात्रामा अबैध व्यापार फस्टाइरहेको चर्चा सुनिन्छ ।
गत महिना नक्कलबन्दा छोटी भन्सार नजिकै मेची सीमामा सशस्त्र प्रहरीबीच नै कुटाकुटको घटना भएको थियो । अबैध मालसामान छाडेको निहुँमा त्यहाँ ड्युटीमा रहेका सशस्त्र प्रहरीबीच कुटाकुट भएको समाचार बाहिरिएको थियो ।
कतिपय ठूला व्यावसायिक घरानाले विभिन्न तरिकाले मूल भन्सारबाटै राजस्वमा हानी नोक्सानी पुर्याई भारतबाट मालसामान ल्याउने गरेको पाइएको छ । केही त्यस्ता घटनामा सुरक्षाकर्मी, भन्सार, राजस्व अनुसन्धान लगायतका निकायले कारोवारीलाई समातेको पनि पाइएको छ ।
अर्को कारण चाहिँ पेट्रोलियम पदार्थको र सुपारीको आयात घट्नु पनि हो ।
तेस्रो मुलुकबाट टनका टन सुपारी मेची भन्सार भएर आयात हुँदा राजस्व उकालो लाग्ने गरेको थियो । अहिले सुपारीको आयात शुन्य अवस्थामा छ । पेट्रोलियम पदार्थको आयात पनि निकै घटेको भन्सार अधिकारीहरु बताउँछन् ।
तीन वर्षदेखि राजस्व घट्दै
मेची भन्सार कार्यालयको राजस्व असुली बिगत तीन वर्षदेखि ओरालो लागिरहेको छ ।
आर्थिक वर्ष २०७८/०७९ मा १७ अर्ब ५३ करोड १९ लाख २८ हजार रुपैयाँ राजस्व उठाएको मेची भन्सारले आव २०७७/०७८ मा १८ अर्ब ६९ करोड ९२ लाख ६४ हजार रुपैयाँ राजस्व असुली गरेको थियो ।
