मेचीनगर, १५ पुस । मेचीनगर नगरपालिकामा प्रमुख प्रशासकीय अधिकृत टेककुमार रेग्मीमाथि भएको अभद्र व्यवहार सम्बन्धी घटनामा नगरपालिका र निर्माण व्यवसायी राजकुमार थापाको अलग अलग दावी आएको छ ।
थापाले गरे कार्यकक्षमै हुलहुज्जत : नगरपालिका
मेचीनगर नगरपालिकाका सूचना अधिकारी अशोक भेटवालका अनुसार शुक्रवार विहान ८ बजेदेखि नगरप्रमुख गोपाल बुढाथोकीको कार्यकक्षमा नगरपालिकाको बैठक बसिरहेको थियो ।
विहान १० बजेतिर निर्माण व्यवसायी राजकुमार थापाको नेतृत्वमा रहेको समूहले बैठक स्थलमै प्रवेश गरेर प्रमुख प्रशासकीय अधिकृत रेग्मीमाथि अभद्र व्यवहार गरेको थियो ।
बैठकस्थलमा नगरप्रमुख बुढाथोकी समेत उपस्थित थिए । त्यहाँ रहेका थापा पक्षधरले हुलहुज्जतसहित अभद्र व्यवहार गरेपछि स्थिति तनावग्रस्त भएको र प्रमुख प्रशासकीय अधिकृत रेग्मीलाई नगरप्रहरी लगायतले सुरक्षा दिएर जोगाएको उहाँको भनाई छ ।
नगरपालिकाको बैठकले अभद्र व्यवहारमा संलग्नहरुको किटानी नामसहित जिल्ला प्रशासन कार्यालयमा उजुरी दिने निर्णय गरेको उहाँले बताउनुभयो ।
लगत्तै प्रमुख प्रशासकीय अधिकृत रेग्मीले निर्माण व्यवसायी थापा लगायतलाई पक्राउ गरी कानूनी कार्वाहीको माग गर्दै प्रमुख जिल्ला अधिकारी समक्ष निवेदन दिनुभएको सूचना अधिकारी भेटवालले जानकारी दिनुभयो ।
सीसी क्यामेरा हेरौं : थापा
दमक निवासी निर्माण व्यवसायी राजकुमार थापाले प्रमुख प्रशासकीय अधिकृत रेग्मीमाथि आफुले अभद्र व्यवहार नगरेको र बरु उल्टै रेग्मीले आफुलाई अभद्र व्यवहार गरेको जिकीर गर्नुभएको छ ।
‘भ्याट कर तिरेर मैले नै बैधानिक रुपमा संकलन गरेको ढुंगाबालुवा लैजान किन नदिएको भनेर प्रश्न गरेको हो,’ थापाले भन्नुभयो– ‘त्यति भन्न पनि नपाउनु ? मैले अभद्र व्यवहार गरेँ कि उहाँ (रेग्मी)ले गर्नुभयो, सीसी क्यामेरा त होला नि, हेरौं न ?’
उहाँले अभद्र व्यवहार गरेको भनेर मिडियामा आफ्नो नाम उल्लेख गरिएकोमा समेत आपत्ति व्यक्त गर्नुभयो ।
आफुले विहीवार पनि प्रमुख प्रशासकीय अधिकृत रेग्मीसँग भेटेर ढुंगाबालुवा सम्बन्धी कानून बमोजिम निर्णय गरिदिनु पर्यो भनेर अनुरोध गरेको थापाले बताउनुभयो ।
विहीवारको भिडियो
विहीवार नगरपालिकाको परिसरमा सुरक्षाकर्मीकै अगाडि प्रमुख प्रशासकीय अधिकृत रेग्मीसँग निर्माण व्यवसायी थापाको भनाभन भएको भिडियो रेकर्ड प्राप्त भएको छ ।
उक्त भिडियोमा थापाले ढुंगाबालुवा सम्बन्धी नगरपालिकाले सही निर्णय लिन नसकेको आरोप प्रमुख प्रशासकीय अधिकृत रेग्मीमाथि लगाएको देखिन्छ ।
रेग्मीले चाहिँ थापाले बोलेको कुराको भिडियो आफ्नो मोवाइलबाट खिचिरहेको देखिन्छ । रेग्मीले थापाको अन्तरवार्ता लिए जस्तो देखिने यो भिडियो त्यहाँ उपस्थित अरुहरुले पनि खिँचेका थिए ।
