३१ असार २०८१, आइतवार

अन्तर्राष्ट्रिय झापाली समाजको तेस्रो क्षेत्रीय सम्मेलन माल्टामा हुने

८ चैत २०८०, बिहिवार
Image

बिर्तामोड, ८ चैत । अन्तर्राष्ट्रिय झापाली समाजको तेस्रो क्षेत्रीय सम्मेलन युरोपियन मुलुक माल्टामा हुने भएको छ । 

सम्मेलन अप्रिल २७ र २८ तारिख अर्थात आगामी वैशाख १५ र १६ गते हुने भएको हो ।

समाजको दोस्रो बैठकले तेस्रो क्षेत्रीय सम्मेलन माल्टामा गर्ने निर्णय गरेको संस्थाका अध्यक्ष मुकुन्द ढुंगाना र महासचिव नविन पोखरेलले विज्ञप्ति जारी गरी जानकारी दिएका छन् ।  

विश्वभरि छरिएर रहेका झापालीहरुको साझा छाता संस्था अन्तर्राष्ट्रिय झापाली समाजको एक कार्यकालमा एक क्षेत्रीय सम्मेलन गर्ने लक्ष्यअनुरुप यस पटक युरोपमा सम्मेलन हुन लागेको अध्यक्ष ढुंगानाले जानकारी बताए । सन् २०१८ पछि कोरोना महामारी तथा अन्य कारणले समाजको क्षेत्रीय सम्मेलन हुन सकेको थिएन ।

सम्मेलनलाई भव्य रुपमा सम्पन्न गर्न झापाली समाज माल्टाले तयारीलाई तीब्र बनाएको छ ।

सम्मेलनमा विश्वभरि रहेका झापालीलाई एकीकृत गर्दै आपसी भाइचारा बढाउँदै पहिलो र दोस्रो क्षेत्रीय सम्मेलनमा घोषणा गरिएको बृहत लगानीलाई मूर्तरुप दिन गृहकार्य गर्ने जनाइएको छ ।

संस्थालाई भविष्यमा आइपर्ने विभिन्न कार्यहरुमा आर्थिक सहजताका लागि अक्षयकोष स्थापना गर्ने तथा युरोप लगायत अन्य क्षेत्रमा राष्ट्रिय समितिहरु विस्तार गर्ने लगायतका विषयमा छलफल गरी सम्मेलनले घोषणा पत्र जारी गर्ने विज्ञप्तिमा उल्लेख छ ।

संसारभर छरिएर रहेका झापालीहरुलाई उक्त सम्मेलनमा सहभागिताका लागि अन्तर्राष्ट्रिय झापाली समाज र झापाली समाज माल्टाले आग्रह गरेको छ ।

समाजका संस्थापक अध्यक्ष तथा एनआरएनए ओसेनिया क्षेत्रीय संयोजक दीनेशकुमार पोखरेलले झापाको विकासमा लगानी भित्र्याउन तथा विश्वभर छरिएका झापाली स्वयंको व्यक्तिगत हितका लागि समेत यो सम्मेलन महत्वपूर्ण हुने बताएका छन् ।

विश्वका ४० बढी राष्ट्रमा रहेका झापालीले झापाको इष्टर्न सहारा कम्पनी लिमिटेडमा समेत लगानी गर्न चासो र इच्छा व्यक्त गरिरहेको बताइएको छ । इष्टर्न सहारा कम्पनी लिमिटेडले आवश्यक प्रक्रिया पूरा गरी आईपीओ निष्काशनका लागि ग्लोबल आईएमइ क्यापिटललाई बिक्री प्रबन्धक चयन गरिसकेको छ ।

अन्तर्राष्ट्रिय झापाली समाजले  पहिलो क्षेत्रीय सम्मेलन सन् २०१८ को अप्रिल २६ देखि २८ तारिखसम्म कतारमा र दोस्रो क्षेत्रीय सम्मेलन सोही वर्षको सेप्टेम्बर २४ देखि २६ तारिखसम्म दक्षिण कोरियामा सम्पन्न गरेको थियो । त्यसयता कोरोना महामारी लगायतका कारण सम्मेलन हुन नसेकेको थिएन ।

समाजले झापामा सामाजिक क्षेत्रमा करोड रुपैयाँभन्दा बढी लगानी गरिसकेको छ । त्यस्तै, भौतिक संरचना निर्माणदेखि स्वास्थ्य, शिक्षाका क्षेत्रमा काम गर्दै आएको छ ।

ढुंगानाको नेतृत्वमा समिति बनेपछि अन्तर्राष्ट्रिय झापाली समाजले झापा गोल्ड कपलाई ७ लाख र नेपाल पत्रकार महासंघ झापाको पत्रकार सहारा उपचार कोषलाई २ लाख रुपैयाँ हस्तान्तरण गरिसकेको छ । 

त्यस्तै बुद्धशान्ति र गौरीगञ्ज गाउँपालिकामा दुई वटा एम्बुलेन्स, कनकाईमा एक थान शव बहान हस्तान्तरण गर्ने तयारी गरिरहेको छ । त्यसैगरी कनकाईको धनुषकोटी धाममा शौचालय निर्माणमा सहयोग गर्ने समाजले जनाएको छ । अन्य कार्यक्रम र सहयोग बारे सम्मेलनले निर्णय लिने बताइएको छ ।