६ पुष २०८१, शनिवार
झापा, २४ कात्तिक । सौर्य ऊर्जा उत्पादन गर्दै आएको झापा इनर्जी लिमिटेडले नौ महिनामा रु. सात करोड ११ लाख ३८ हजार ७१० मूल्य बराबरको विद्युत उत्पादन गरेर नेपाल विद्युत प्राधिकरणलाई विक्री गरेको छ ।
झापाको शिवसताक्षी नगरपालिका वडा नं. ४ बुलुचोकमा उक्त कम्पनीको सौर्य विद्युत परियोजना सञ्चालनमा रहेको छ । गत वर्षको माघ २३ गते प्रधानमन्त्री केपी शर्मा ओलीले उक्त परियोजनाको उद्घाटन गर्नु भएको थियो ।
कम्पनीका प्रबन्ध सञ्चालक सुभाष भट्टराईले गत वर्षको माघ १० गतेदेखि विद्युत उत्पादन सुरु गरेको बताउनुभयो । गत माघ १० देखि यसवर्षको कात्तिक २० गतेसम्मको अवधिमा परियोजनाले एक करोड १९ लाख सात हजार ७८१ युनिट विद्युत उत्पादन गरेको उहाँले जानकारी दिनुभयो ।
परियोजनाबाट उत्पादित विद्युत नजिकै रहेको नेपाल विद्युत प्राधिकरणको बुलुचोक सबस्टेसनमार्फत राष्ट्रिय ग्रिडमा जोडिने गरेको छ । परियोजनाको १० मेगावाट विद्युत उत्पादन क्षमता रहेको छ ।
हिउँदभन्दा बर्खे अवधिमा चर्को घाम लाग्ने भएकाले सौर्य विद्युत बढी मात्रामा उत्पादन हुने गरेको छ । “हिउँदमा अधिकतम् दैनिक ५९००० युनिटसम्म उत्पादन भएको छ,” कम्पनीका प्रबन्ध सञ्चालक भट्टराईले भन्नुभयो–“तर, बर्खाको चर्को घाम लागेका बेला दैनिक एक लाखभन्दा बढी युनिट विद्युत उत्पादन हुने गर्दछ ।”
नेपाल विद्युत प्राधिकरणले विद्युत खरिद सम्झौता बमोजिम कम्पनीबाट उत्पादित विद्युत प्रति युनिट रु. सात रुपैयाँ ३० पैसाका दरले खरिद गर्दै आएको छ ।
शिवसताक्षी–४ बुलुचोकमा कम्पनीले खरिद गरेको २२ बिगाहा जग्गामा परियोजना रहेको छ । त्यहाँ सूर्यको प्रकाशबाट आउने किरणलाई संश्लेषण गर्नका लागि ठूलो क्षेत्रफलमा सौर्य प्यानल राखिएका छन् ।
प्रबन्ध सञ्चालक भट्टराईका अनुसार परियोजनामा रु. ८७ करोड लगानी भएको छ । जसमा माछापुच्छ्रे बैंक र हिमालयन बैंकले रु. ६२ करोड ऋण लगानी गरेका छन् ।
जनस्तरबाट पूँजी संकलन गरी स्थापना गरिएको झापा इनर्जी लिमिटेड झापामा विद्युत उत्पादन गर्ने एकमात्र परियोजना हो । यसमा आठ सय सर्वसाधारणको रु. ५० हजारदेखि रु. ५० लाखसम्म शेयर लगानी रहेको छ ।
परियोजनामा दुई इन्जिनियरसहित १२ जनाले स्थायी रोजगारी प्राप्त गरेका छन् । विद्युत उत्पादन प्रणाली स्वचालित भए तापनि परियोजनास्थलको रेखदेख र आवश्यक मर्मत सम्भारका लागि कर्मचारीहरु दिनरात खटिने गरेको भट्टराईले बताउनुभयो ।
