१४ पुष २०८१, आइतवार
झापा, १३ पुस । झापामा एउटा पाँचतारे होटल थपिएको छ । मेचीनगर नगरपालिकाको वडा नं. ७ इटाभट्टामा ‘अश्वत्थ’ नामक पाँच तारे होटल थपिएको हो ।
सञ्चार उद्यमी प्रज्ज्वल घिमिरेले होटल ‘अश्वत्थ’मा रु. एक अर्ब ३० करोड लगानी भएको बताउनुभयो । यही सन् २०२५ को जनवरीको पहिलो दिनदेखि होटल सञ्चालनमा आउने उहाँले जानकारी दिनुभयो ।
काँकडभिट्टाबाट चार किलोमिटर पश्चिम इटाभट्टामा पूर्वपश्चिम राजमार्गसँगै जोडिएको होटल ‘अश्वत्थ’ दुई बिगाहा क्षेत्रफलमा फैलिएको छ । मेचीनगरको वडा नं. ८ मा अर्को पाँचतारे ‘होटल मेची क्राउन’ बिगतदेखि सञ्चालनमा रहेको छ ।
झापामा अब तीन वटा पाँचतारे दर्जाका पर्यटकस्तरीय होटल भएका छन् । विर्तामोडमा यस्तै पाँचतारे होटल ‘किङ्सबेरी’ पनि सञ्चालनमा छ । अरु दुई वटा पाँचतारे स्तरका होटल झापामा प्रस्तावित छन् । यसप्रकार झापा पाँचतारे होटलको हब बनेको छ ।
केही दिनपछि नै सञ्चालनमा आउने होटल ‘अश्वत्थ’ले पाहुनाका लागि अनलाइन बुकिङ खुला गरिसकेको छ । होटलमा ८४ वटा स्वीट्स र डिलक्स कोठाहरु भएको प्रमुख व्यवस्थापक कुमार कोइरालाले बताउनुभयो ।
होटलमा इन्डोर स्वीमिङ पुल, जाकुजी, स्पा, ब्याङ्केट हल, ध्यान र योग साधनाको सुविधा उपलब्ध रहेको उहाँले जानकारी दिनुभयो । क्यासिनो समेत होटलमा सञ्चालन हुने भएको छ ।
एसियाका ३२ मुलुकलाई स्थलमार्गबाट जोड्ने एसियाली राजमार्गको निर्माण तीब्र गतिमा भइरहेको कारण नेपालको पूर्वी प्रवेशद्वार मेचीनगरमा पर्यटकीय चहलपहल बढ्ने भएकाले उत्साहित भएर पाँचतारे होटलमा आफुले लगानी गरेको सञ्चालक प्रज्ज्वल घिमिरे बताउनुहुन्छ ।
भारतका मुख्य सहरहरुमा दैनिक ४० उडान भरिरहेको बागडोग्रा विमानस्थल र रात्रिकालीन सञ्चालन क्षमता भएको चन्द्रगढी विमानस्थलबाट ३० किलोमिटरभन्दा कम दूरीभित्र रहेको मेचीनगर बाह्य र आन्तरिक पर्यटकहरुका लागि बासस्थान भएको उहाँले बताउनुभयो ।
“भारतीय, भूटानी र बंगलादेशी पर्यटकलाई लक्षित गरी होटल खोलेका हौं,” उहाँले भन्नुभयो–“भविष्यमा इन्डोनेसियाको बाली र थाइल्यान्डको बैंककबाट पर्यटकहरु नेपाल घुम्न एसियन हाइवे हुँदै नेपालमा सजिलै आइपुग्ने सम्भावना छ । यही सम्भावना देखेर धमाधम अरु होटल पनि खुलिरहेका हुन् ।”
पूर्वीनाकाको पाँच किलोमिटरभित्र काँकडभिट्टा, इटाभट्टा र धुलाबारी बजार क्षेत्र पर्दछन् । इटाभट्टा क्षेत्रमा पाँचतारे ‘अश्वत्थ’ र ‘मेची क्राउन’ रहेका छन् । यी दुबै होटलमा क्यासिनो समेत सञ्चालन रहेका छन् । काँकडभिट्टाका अरु दुई पर्यटकीय होटलमा मिनी क्यासिनो चलिरहेका छन् ।
अब मेचीनगरमा क्यासिनोको संख्या चार पुगेको छ । मेचीनगरको वडा नं. १० धुलाबारीमा अर्को एउटा पाँचतारे होटलको भवन निर्माणाधीन अवस्थामा छ । मेडिकल व्यवसायी दुर्गा प्रसाईद्वारा विर्तामोडमा थप एउटा पाँचतारे होटलको निर्माण भइरहेको छ ।
भारतको गोवा र सिक्किममा मात्र क्यासिनो सञ्चालन हुने भएकाले भारतीय धनाढ्यहरु नेपालका क्यासिनोप्रति आकर्षित छन् । क्यासिनो सञ्चालनले होटल व्यवसायमा समेत टेवा पुगेको छ ।
होटल ‘अश्वत्थ’मा सुरुमै ५५ जनाले प्रत्यक्ष रोजगारी पाएका छन् । होटलले पर्यटकका लागि हिमाली क्षेत्रको दृश्यावलोकन गराउन माउन्टेन फ्लाइटको समेत व्यवस्था मिलाएको प्रमुख व्यवस्थापक कोइरालाले बताउनुभयो । भारतको आसाम, दिल्ली र पश्चिम बंगालका पर्यटकहरुले होटलको बुकिङ गर्न थालिसकेको उहाँले जानकारी दिनुभयो ।
