झापा, १९ चैत । अमेरिकाबाट निष्काशित भएका भूटानी शरणार्थीहरुलाई राज्यविहीन नबनाउन भूटाका पाँच वटा राजनीतिक संगठनले अन्तर्राष्ट्रिय समुदायसँग अपिल गरेका छन् ।
भूटान पिपल्स पार्टीका अध्यक्ष बलराम पौडेल, ड्रुक नेसनल कांग्रेस प्रजातान्त्रिकका अध्यक्ष रिन्जिन दोर्जी, भूटानी शरणार्थी प्रतिनिधि स्वदेश फिर्ती समितिका कार्यवाहक अध्यक्ष तिलक राई, नेसनल रिकन्सिलेसन कमिटी भूटानका संयोजक कृष्णवीर तामाङ, भूटान स्वतन्त्र जनमञ्चका महासचिव डीबी सुब्बाले आज संयुक्त विज्ञप्ति जारी गर्दै त्यस्तो अपिल गर्नु भएको हो ।
अमेरिकाबाट निष्काशित आफ्ना नागरिकहरुलाई संरक्षण प्रदान गर्नुको साटो भूटान सरकारले देश निकाला गरेको भन्दै उहाँहरुले विरोध जनाउनु भएको छ। स्वदेश फर्किन लालायित सबै भूटानीहरुलाई देशमै बस्ने वातावरणको बनाउन र शरणार्थी समस्याको दीर्घकालीन समाधानको पहल गर्न उहाँहरुले विज्ञप्तिमा जोडदार माग गर्नु भएको छ ।
संयुक्त राज्य अमेरिकामा पुनर्वास गरिएका दश जना भूटानी शरणार्थीलाई केही दिन अघि अमेरिका सरकारले निष्काशित गर्दै भूटानको पारो विमानस्थलमा ल्याएर छाडिदिएको जनाउँदै तीमध्ये तीन जना आशिष सुबेदी, रोशन तामाङ र सन्तोष दर्जीलाई भूटान सरकारले भारतमा पुर्याएर छाडिदिएको विज्ञप्तिमा उल्लेख छ ।
भारत सरकारले समेत ती तीन जनालाई सीमापार गर्दै मध्यरातमा नेपालमा ल्याएर छाडिदिएको, उनीहरु हाल अध्यागमनको हिरासतमा रहेको र अन्य सात जनाको स्थिति अज्ञात रहेको विज्ञप्तिमा जनाइएको छ ।
आफ्नो नागरिकको संरक्षण नगरेर भूटान सरकारले अमानवीय र अन्तर्राष्ट्रिय कानुन विपरीत कार्य गरेको जिकीर गर्दै भूटानी राजनीतिक दल तथा अधिकारकर्मीहरुले विज्ञप्तिमार्फत भूटानी शरणार्थीहरुलाई राज्यविहीनता र पहिचानविहीनता हुनबाट बचाउन एमनेस्टी इन्टरनेसनल लगायतका अन्तर्राष्ट्रिय मानवाधिकारबादी संस्थाहरुलाई अपिल गर्नु भएको छ ।
उहाँहरुले अमेरिकाबाट निष्काशित गरिएका दश जनामध्ये हराइरहेका सात जना भूटानी शरणार्थीको खोजी कार्य गरिदिन अन्तर्राष्ट्रिय समुदाय र अमेरिकी दूताबासलाई आग्रह गर्नु भएको छ । तेस्रो मुलुक पुनर्वास कार्यक्रम समेत भूटानी शरणार्थी समस्याको दीगो समाधान नभएको यस घटनाबाट पुष्टि भएको भन्दै उहाँहरुले स्वदेश फिर्ती नै सबैभन्दा उत्तम समाधान भएको उल्लेख गर्नु भएको छ ।
एक जना निर्वासित थपिए
यसैबीच, भारतबाट नेपाली सीमा पार गर्दै गरेको अवस्थामा सोमवार राति २९ वर्षीय अशोक गुरुङलाई सशस्त्र प्रहरी बलले नियन्त्रणमा लिएको छ ।
उहाँ भूटानी शरणार्थी भएको र अमेरिकाबाट निर्वासित भूटानी शरणार्थी भएको प्रहरीले जनाएको छ । हाल इलाका प्रहरी कार्यालय काँकडभिट्टामा राखिएका गुरुङसँग परिचय खुल्ने कुनै कागजपत्र छैन ।
