१२ वैशाख २०८२, शुक्रवार
झापा, २१ चैत । धुलाबारीमा रहेको मेचीनगर आधारभूत अस्पतालमा आजदेखि थप भिडियो एक्सरे सेवा पनि सुरु भएको छ ।
विहीबार मेचीनगर नगरपालिकाका प्रमुख गोपालचन्द्र बुढाथोकी र उपप्रमुख मीना पोखरेल उप्रेतीले अस्पतालमा राखिएको भिडियो एक्सरे सेवा उद्घाटन गर्नु भएको हो । उक्त सेवा दैनिक विहान ८ वजेदेखि उपलब्ध हुनेछ ।
यस अघिदेखि अस्पतालले प्रत्येक मंगलबार स्त्री रोग तथा प्रसुती सेवा, विहीबार बालरोग तथा नाक, कान र घाँटीको सेवा, शुक्रबार जनरल फिजिसियन सेवा, दैनिक विहान ६ वजेदेखि ओपिडी सेवा, ईसीजी, युएसजी सेवा, बीमा तथा अन्य निःशुल्क सेवाहरु विशेषज्ञ र एमवीवीएस डाक्टरहरुबाट दिँदै आएको छ ।
आगामी बैशाख दोस्रो हप्तादेखि थप १५ वेडमा विरामी भर्ना गरिने, थाइराइड र २४ सै घण्टा आकस्मिक सेवा दिइने नगरपालिकाकी स्वास्थ्य शाखा प्रमुख सविता सापकोटाले बताउनुभयो ।
अस्पताल परिसरमा बनिएको १५ वेडको नयाँ सामुदायिक बहुउदेश्यीय भवनबाट अब चाँडै सेवा सुरु गरिने बताइएको छ ।
नगर अस्पताल सुरु भएदेखि सात महिनामा ६२ हजार ८७७ जना विरामीले विभिन्न सेवा लिएको उहाँले जानकारी दिनुभयो ।
गत भदौ ४ गतेदेखि फागुनसम्ममा ६२ हजार ८७७ जना विरामी मध्ये १९ हजार ५०५ जनाले ल्याव सेवा लिएको, २२३४ जनाले युएसजी सेवा, ८४८ जनाले ईसीजी सेवा र २७५ जना विरामीले इमरजेन्सीमा सेवा लिएको सापकोटाले बताउनुभयो ।
लोकतन्त्र पोस्टका पूर्वसहकर्मी अर्जुन कार्की हाल मेचीनगर अनलाइनका सम्पादक हुनुहुन्छ ।
