२१ चैत २०८१, शुक्रवार
झापा, २१ चैत । नेकपा एमालेका केन्द्रीय सदस्य रोमनाथ ओलीले पत्रकारहरुलाई समाचारमा निष्पक्ष र विचारमा स्पष्ट हुन सुझाव दिनु भएको छ ।
प्रेस चौतारी नेपालको केन्द्रीय नेतृत्वमा झापाबाट निर्वाचित पदाधिकारीहरुको सम्मानमा आज विर्तामोडमा आयोजित कार्यक्रममा ओलीले उक्त सुझाव दिनु भएको हो ।
‘पत्रकारले राजनीति गर्न हुँदैन भन्ने कुरा म यदाकदा सुन्ने गर्छु,’ पार्टीका जिल्ला इञ्चार्ज समेत रहनु भएको नेता ओलीले भन्नुभयो– ‘समाचारमा राजनीतिक पक्षपोषण नगरी सन्तुलनमा राखेर प्रस्तुत गर्नुपर्छ । तर विचार निर्माणका लागि राजनीतिक ज्ञान नभएको पत्रकारले उत्कृष्ट सामग्री पस्कनै सक्तैन ।’
कतिपय आमसञ्चार माध्यमहरु र सामाजिक सञ्जालमा बहुदलीय व्यवस्थाप्रति वितृष्णा उत्पन्न हुने खालका समाचार सामग्रीहरु प्रकाशन प्रसारण भइरहेको उल्लेख गर्दै त्यस्तो निराशा र वितृष्णा पस्किने कार्य नगर्न आग्रह गर्नुभयो ।
उहाँले पत्रकारको काम आशा र संभावना देखाउने भएको धारणा राख्दै निराशा फैल्याउने कार्य गलत भएको बताउनुभयो ।
प्रेस चौतारी नेपाल झापा जिल्ला कमिटीका अध्यक्ष प्रदीप परियारको अध्यक्षतामा भएको प्रेस चौतारी झापाको विस्तारित बैठकमै सम्मान कायृक्रम समेत आयोजना भएको थियो ।
कार्यक्रममा प्रेस चौतारी नेपाल झापाले नवनिर्वाचित केन्द्रीय सदस्यहरुलाई बधाई ज्ञापन गरेको थियो ।
चैत १०–१२ विराटनगरमा सम्पन्न राष्ट्रिय महाधिवेशनबाट केन्द्रीय सदस्यमा माधव विद्रोही, गोपाल काफ्ले, सावित्रा दाहाल, मिना विश्वकर्मा र शम्भु दाहाल निर्वाचित हुनु भएको थियो ।
प्रमुख अतिथि ओलीले रुद्राक्षको माला लगाईदिएर बधाई शुभकामना ज्ञापन गर्नुभएको थियो ।
बैठकले चैत १५ गते काठमाडौंको तीनकुनेमा भएको राजावादी समर्थकको हिंसात्मक आन्दोलनका क्रममा मारिएका पत्रकार सुरेश रजकको हत्यारालाई कारबाहीको माग गरेको छ ।
