१२ वैशाख २०८२, शुक्रवार
झापा, २२ चैत । राजाबादी आन्दोलनका कमान्डर दुर्गा प्रसाईले चैत १५ गते काठमाडौंको तनावग्रस्त तीनकुनेबाट बाहिरिने क्रममा प्रयोग गरेको बीएबी ४२०८ नम्बरको स्कर्पियो गाडी प्रहरीले इटहरीमा फेला पारेको छ ।
राजधानीबाट प्रकाशित नेपाल प्रेस अनलाइनले जनाए अनुसार तीन दिन अघि नै प्रहरीले उक्त गाडी भेटाएको थियो ।
उक्त गाडीमा प्रसाई नभएको प्रहरीको भनाई उद्धत गर्दै नेपाल प्रेसले लेखेको छ ।
उक्त गाडी प्रसाईले चैत १५ गते अपराह्न ३ बजेर २६ मिनट जाँदा प्रयोग गरेको पाइएको जनाइएको छ । त्यसपछि प्रसाईलाई प्रहरीले पक्राउ गर्न खोजे पनि भेटेको छैन भने गाडी इटहरीमा भेटिएको हो ।
गाडी इटहरीमा भेटिएकै आधारमा प्रहरीले प्रसाई काठमाडौंको आन्दोलन भड्काएर झापामै आएर लुकेको र मन्दिरको आडमा बसेर भिडियो सन्देश फैलाएको हुनसक्ने आशंका गरेको थियो ।
प्रहरीले यही आशंकामा विर्तामोडस्थित प्रसाई निवास र वरपर लुकेको हुनसक्ने शंकास्पद स्थानमा सर्च अपरेसन गरेको बताइएको छ । प्रहरीले अहिलेसम्म प्रसाईको अत्तोपत्तो पाउन सकेको छैन ।
प्रहरीले इटहरीमा भेटिएको गाडीका चालक ईश्वर बिक र गाडीधनी मुकुन्द दाहाललाई नियन्त्रणमा लिएको थियो । विक छुटिसकेका छन् भने दाहाल अझै प्रहरीकै हिरासतमा रहेको बताइएको छ । दाहालमाथि प्रहरीले मुद्धा समेत लगाएको छ ।
प्रसाई भेष बदलेर काठमाडौंबाट भारतको उत्तर प्रदेश वा झापातिर पुगेको हुनसक्ने हल्ला चले तापनि त्यो कुराको पुष्टि हुने कुनै आधार भेटिएको छैन । प्रसाईले काठमाडौंबाट बाहिरिए पछि सार्वजनिक गरेको एक मात्र भिडियो सन्देशमा आफु सुरक्षित रहेको र प्रहरीलाई नराम्रो व्यवहार गर्ने मानिस नभएको बताएका थिए ।
