झापा, २३ चैत । नेपाली कांग्रेसका महामन्त्री विश्वप्रकाश शर्माले पूर्वराजा ज्ञानेन्द्र शाहलाई आफुसँग जनता छन् भन्ने लागेको भए २०८४ सालको आम चुनावमा ‘श्रीपेच चुनाव चिह्नमा दुई तिहाई जनमत ल्याउन’ चुनौति दिनु भएको छ ।
गृहनगर मेचीनगरको धुलाबारीमा पार्टीद्वारा आज आयोजित क्षेत्रीय तहको प्रशिक्षण कार्यक्रममा बोल्दै उहाँले चुनावबाट जनमत सावित गरेर चाहेजस्तो व्यवस्था ल्याउन चुनौति दिनु भएको हो । “पूर्वराजालाई आफुसँग जनता छन् भन्ने लागेको भए,” उहाँले भन्नुभयो– “चौरासीको चुनाव आउँदैछ, श्रीपेच चुनाव चिह्नमा मत माग्नुहोस्, दुई तिहाई ल्याएर जनता आफुसँग भएको देखाउनुहोस् । अनि संबैधानिक राजा रहनेगरी संविधान संशोधन गर्दा भइहाल्यो ।”
संविधानसभाको पहिलो बैठकले विधिवत् रुपमा लोकतान्त्रिक गणतन्त्रको घोषणा गरेको स्मरण गर्दै महामन्त्री शर्माले सडकमा केही समर्थक उतार्दैमा राजाबादीहरुले संविधानसभाको निर्णय उल्टाउन नसक्ने बताउनुभयो । उहाँको भनाई थियो–“संविधानसभाको निर्णय बदल्ने उपाय भनेको विधिवत् ढंगले संविधानको संशोधन हो । त्यसो गर्न चुनावमा दुई तिहाई बहुमत ल्याउनैपर्छ ।”
हिजो राजाको पालाको जस्तो संविधान संशोधनको अधिकार कसैको हुकुम र हातमा नभएको हेक्का राख्न उहाँले राजाबादीहरुलाई चेतावनी दिनुभयो । उहाँले सडकमा मान्छे उतार्दै आकाशतिर फर्केर मेरा जनता यति छन् र उति छन् भनेर अनुमान गरेको भरमा जनमत यकिन नहुुने स्पष्ट हुन आग्रह गर्दै नेपाली जनताले कुन बंशको गर्भबाट जन्मेको भन्ने आधारमा नभएर कस्तो कर्म गरेको भन्ने आधारमा आफ्ना प्रतिनिधि चुन्ने गरेको बताउनुभयो ।
नेकां झापा १ नं. क्षेत्रीय समितिका सभापति इन्द्र बुढाथोकीको अध्यक्षतामा भएको कार्यक्रममा खानेपानी, स्ववियू लगायतका चुनावमा विजयी र उपबिजयी नेपाली कांग्रेसका उम्मेद्वारहरुलाई सम्मान गरिएको थियो । क्षेत्रीय उपसभापति हरि बुढाथोकीले कार्यक्रममा स्वागत मन्तब्य राख्नु भएको थियो ।
