२४ चैत २०८१, सोमवार
झापा, २४ चैत । पूर्व कानून मन्त्री एवम् नेकपा एमालेका स्थायी समिति सदस्य अग्निप्रसाद खरेलले निर्वाचन प्रणालीमा जतिसक्दो छिटो संविधान संशोधन गरेर अघि बढ्न राजनीतिक दलहरु तयार हुनुपर्ने बताउनु भएको छ ।
प्रेस चौतारी झापाले शनिवार विर्तामोडमा आयोजना गरेको पत्रकार भेटघाट कार्यक्रममा बोल्दै प्रधानमन्त्री केपी शर्मा ओलीका सल्लाहकार समेत रहनु भएको खरेलले गणतान्त्रिक व्यवस्था, संघीयता र समावेशितालाई नबिगारिकन चुनावी प्रणालीमा संविधान संशोधन गरिनु पर्ने धारणा व्यक्त गर्नुभयो ।
उहाँले निर्वाचन प्रणाली संशोधन आवश्यक रहेको चर्चा गर्दै कुनै पनि दलको एकल बहुमत आउन नसक्ने अहिलेको मिश्रित चुनाव प्रणाली राजनीतिक स्थिरताको बाधक बनेको दावी गर्नुभयो ।
संविधान संशोधन गर्न जति ढिला भयो, संविधानलाई असफल बनाउन लाग्नेहरु त्यति नै धेरै सक्रिय हुने जनाउँदै उहाँले राजनीतिक दलहरुले यस विषयमा छलफल चलाउनु पर्ने बताउनुभयो ।
उहाँले समानुपातिक पद्धतिबाट निर्वाचित हुने विधायकहरुलाई राष्ट्रिय सभाको सदस्य बनाउन सकिने विकल्प सुझाउँदै भन्नुभयो–“चुनावी प्रणालीमा के कस्तो संशोधन आवश्यकता पर्छ, आउनुहोस् छलफल गरौं । तर, अहिलेको निर्वाचन प्रणाली परिवर्तन नगरी राजनीतिक स्थिरताको कल्पना गर्न सकिदैन ।”
पत्रकारहरुले सोधेको प्रश्नको जवाफ दिदै उहाँले आजको २१ औं शताब्दी निरंकुशताको युग नभएको बताउनुभयो । वि.सं. २०४६ अघि र त्यसपछि भएको विकास निर्माणको तुलना गरियो भने अहिलेको व्यवस्थाले आम नागरिकको जीवनमा ठूलो परिवर्तन ल्याएको सावित हुने बताउनुभयो ।
