झापा, २१ भदौ। क्रंक्रिटका ब्लक उत्पादन गर्दै आएका साना व्यवसायीहरुले नेपाल गुणस्तर चिह्न (एनएस मार्क) अनिवार्य लागू गर्नुअघि बैकल्पिक व्यवस्थासहित व्यावहारिक समयसीमा पाउनु पर्ने माग गरेका छन् ।

झापा जिल्ला इन्टरलक ब्लक कंक्रिट उद्योग व्यवसायी संघले उक्त माग राखेको हो ।

सरकारले सबै व्यवसायीका लागि नेपाल गुणस्तर चिह्न अनिवार्य गरेपछि उनीहरुले साना व्यवसायीहरुको सुरक्षा र हितका लागि व्यावहारिक समयसीमाको माग गरेका हुन् । 

झापामा करिब ५० वटा साना इन्टरलक ब्लक कंक्रिट उद्योग सञ्चालनमा छन् । यी उद्योगहरूले स्थानीय उत्पादनलाई प्रोत्साहन गर्दै हजारौं श्रमिकलाई रोजगारी प्रदान गर्दै आएको संघका अध्यक्ष टिकाराम अधिकारीले बताउनुभयो ।

संघले शुक्रबार झापा जिल्ला प्रशासन कार्यालय, पूर्वाधार विकास कार्यालय र सघन शहरी तथा भवन निर्माण कार्यालयमा आफ्नो माग पत्रसहित ज्ञापन पत्र बुझाएका छन् । 

व्यवसायीले जिल्लाका १५ वटै पालिकामा ज्ञापन पत्र बुझाएर स्थानीय सरकारको ध्यानाकर्षण गराउने बताएका छन् ।

झापा जिल्ला इन्टरलक ब्लक कंक्रिट उद्योग व्यवसायी संघका उपाध्यक्ष झमकबहादुर गौतमका अनुसार साना उद्योगीहरुले ज्ञापनपत्र मार्फत नेपाल गुणस्तर चिन्ह सम्बन्धी प्रावधानलाई व्यावहारिक समयसीमा र वैकल्पिक व्यवस्थासहित लागू गर्न, ठूला कम्पनीहरूको अनुचित दबाब नियन्त्रण गर्न र स्थानीय उद्योगीलाई प्रोत्साहन गर्न सरकारसँग माग गरेका हुन् ।