झापा, १४ चैत । झापाको भद्रपुरमा सञ्चालित नेपाल–भारत मैत्रीपूर्ण महिला टी–२० प्रतियोगिताको उपाधि भारतको दून हेरिटेज सिलिगुडीले जितेको छ ।

आज शनिबार भएको फाइनल खेलमा भारतकै अलपाइन स्पोर्टिङ क्लव सिक्किमलाई दुई रनले पराजित गर्दै सिलिगुडीले उपाधि जितेको हो ।

वर्षाका कारण १० ओभरमा सीमित गरिएको खेलमा टस हारेपछि पहिलो ब्याटिङका लागि मैदानमा उत्रिएको सिलिगुडीले निर्धारित ओभरमा ७४ रन बनाएको थियो । सिक्किमले निर्धारित १० ओभरमा ७२ रन मात्र बनाएको थियो ।

नेपाल–भारत मैत्री संघ कोशी प्रदेशको आयोजनामा पहिलोपटक आयोजित प्रतियोगिताको उपाधि जितेसँगै सिलिगुडीले नगद रु. ८० हजार पुरस्कारसहित शील्ड प्राप्त गरेको छ भने सिक्किमले नगद रु. ५० हजार नगद पुरस्कार प्राप्त गरेको छ । प्रतियोगितामा सहभागी तेस्रो टिम नेपालको मिलन क्रिकेट क्लव झापाले रु. १० हजार नगद पुरस्कारसहित प्रमाणपत्र प्राप्त गरेको छ । 

फाइनल खेलको म्यान अफ द म्याचको पुरस्कार विजेता टिमकी तनुजा सरकारले प्राप्त गर्नुभयो भने प्रतियोगिताको सर्वोत्कृष्ट ब्याटर विजयी टिमकै ह्याप्पी सरकार र सर्वोत्कृष्ट बलर विजयी टिमकै हितन राय घोषित हुनु भएको थियो । म्यान अफ द सिरिजको पुरस्कार भने उपविजेता टिमकी मरिन सुब्बा हुनुभयो । 

आयोजक नेपाल भारत मैत्री संघ कोशी प्रदेशका अध्यक्ष छत्रबहादुर गिरीको अध्यक्षतामा आयोजित समापन समारोहलाई सम्बोधन गर्दै प्रमुख अतिथि  भारतीय राजदूतावासका प्रथम सचिव वशिष्ठ नन्दनले नेपाल–भारतबीच अत्यन्त सुमधुर सम्बन्ध रहेको स्मरण गराउँदै खेलकुद माध्यमबाट त्यो सम्बन्ध अझ प्रगाढ हुने विश्वास व्यक्त गर्नु भएको थियो ।