झापा, २० भदौ । वनमा खेर गइरहेका सालका पातहरुलाई संकलन गरेर दुना टपरी बनाई आर्थिकोपार्जन गर्न सकिने उद्देश्यले जिल्लाका दुई सामुदायिक वनले मेसिनद्वारा उत्पादन गर्ने तयारी गरेका छन् । 

कनकाई नगरपालिकामा रहेको जामुनखाडी सामुदायिक वन उपभोक्ता समिति र मेचीनगर नगरपालिकामा रहेको मागुरमाडी सामुदायिक वन उपभोक्ता समूह विट नम्बर २ ले मेसिनबाट सालको पातको दुना टपरी उत्पादनको तयारी गरेका हुन् । 

दुवै सामुदायिक वनलाई डिभिवन वन कार्यालय झापाले मेसिन अनुदानमा उपलब्ध गराएको जनाएको छ । रु. पाँच लाख मूल्य बराबरको मेसिन गत बर्ष जामुनखाडी र यसबर्ष मागुरमाडीलाई उपलब्ध गराएको डिभिजन वन कार्यालय झापाका प्रमुख मेघराज राईले बताउनुभयो । 

उहाँले सामुदायिक वन उपभोक्ता समितिले अति विपन्न तथा गरीब उपभोक्ताको छनोट गरी दुना टपरी बनाइ स्वरोजगार बनाउनुपर्ने बताउनुभयो । बजारमा भारतबाट आयतीत प्लाष्टिकका सामाग्रीलाई यसले विस्थापित गर्ने उहाँको भनाई छ । 

सामुदायिक वन उपभोक्ता महासंघ झापाका अध्यक्ष वेदप्रकाश भण्डारीले स्थानीय वनले उत्पादन गरेका दुनाटपरीको बजारीकरणमा सहयोग गर्ने बताउनुभयो । नेपालीको जन्मदेखि मृत्यु संस्कारसम्म सालको पातको दुना टपरी चाहिने हुँदा यसको बजारीकरणमा समस्या नहुने उहाँको भनाई छ ।

यस अघि जिल्लामा सुपारीको पातको दुना टपरी बनाउने कारखानाहरु स्थापना भए पनि सालको पातको टपरी बनाउने मेसिन भनेको पहिलो पटक ल्याइएको हो । दशैं अघिदेखि नै दुवै सामुदायिक वनहरुले उपभोक्तामार्फत दुना टपरी उत्पादन सुरु गर्ने जामुनखाडी सामुदायिक वन उपभोक्ता समितिका अध्यक्ष पर्शुराम गिरीले बताउनुभयो ।