२२ चैत २०८१, शनिवार
झापा, ३ फागुन । रिडर्स झापाले यही फागुन १४, १५ र १६ गते काँकरभिट्टामा आयोजना गर्ने पाँचौं संस्करणको ‘कला साहित्य उत्सव २०८१’मा भारतका प्रसिद्ध पर्यावरण अभियन्ता सोनाम वाङचुक लगायतको सहभागिता रहने भएको छ ।
आज पत्रकार सम्मेलन गरेर रिडर्स झापाले उक्त जानकारी दिएको हो । उत्सवमा भारतको कोलकाताका अर्का अभियन्ता डा. देवल देव र नेपालका वैज्ञानिक डा. उत्तमबाबु श्रेष्ठ लगायतको सहभागिता रहने रिडर्स झापाका अध्यक्ष शैलेश दाहालले बताउनुभयो ।
उत्सवमा चित्रकला प्रदर्शनी, नाटक मञ्चन, कविता बाचन र प्यानल डिस्कसन लगायतका कार्यक्रमहरु सञ्चालन हुने उहाँले जानकारी दिनुभयो ।
भारतको लद्दाखदेखि दिल्लीसम्म आमरण अनसन लगायतका कार्यक्रम गरेर चर्चामा रहेका सोनाम वाङचुकले हिमालय क्षेत्रको पर्यावरण संरक्षणमा नयाँ प्रविधिको विकास समेत गर्नु भएको छ ।
त्यसैगरी, कोलकाताका डा. अनिल देवले धानका दुई सय रैथाने प्रजातिको खोज अनुसन्धान र संरक्षण गरेर चर्चा पाउनु भएको छ । उहाँले एक सय प्रकारका रैथाने धानको बीउ उत्सवमा प्रदर्शनीका लागि ल्याउनु हुने भएको छ ।
रिडर्स झापाको स्थापना वि.सं. २०६५ मा पठन संस्कृतिको विकास गर्ने उद्देश्यले भएको थियो । यसले वि.सं. २०६९ देखि प्रत्येक दुई वर्षमा चिन्तन मेलाको रुपमा कला साहित्य उत्सवको आयोजना गर्दै आएको छ । कोरोना महामारीमा भने उत्सव स्थगित भएको थियो ।
कार्यक्रममा १२ वटा छलफल सत्र रहने र त्यहाँ ३० जना विज्ञले सम्भाषण दिने उत्सव आयोजक कमिटीका संयोजक सागर शिवाकोटीले बताउनुभयो ।
उत्सवलाई देही आर्ट, चरा तथा बन्यजन्तु संरक्षण समाज र परिवर्तन थिएटरले सहकार्य गरेका छन् । उत्सव अवसरमा चरा अवलोकन, भित्तेचित्र लेखन, फोटो प्रदर्शनी र नाटक मञ्चन गरिने जनाइएको छ ।
नेपाली वैज्ञानिक डा. उत्तमबाबु श्रेष्ठले ‘पर्यावरणीय संकट र नेपाल’ शीर्षकमा बोल्नु हुने र भारतीय पर्यावरण अभियन्ता सोनाम वाङचुकले हिमालय क्षेत्रको पर्यावरण संरक्षणमा भइरहेको आन्दोलन र त्यसका उपलब्धिका बारेमा चर्चा गर्नु हुने भएको छ ।
काँकडभिट्टा खानेपानी कार्यालयको सभाहलमा आयोजना हुने उक्त उत्सवमा रु. १६ लाख खर्च हुने अनुमान गरिएको छ ।
