भैरहवा, फागुन ०४ । आस्था महिला उद्यमी संघद्वारा करिब एकसय किशोरी महिलाहरुलाई भैरहवामा निःशुल्क एकदिने सेनेटरी प्याड बनाउने तालिम प्रदान गरिएको छ । साइन रेसुङ्गा डेभलोपमेन्ट बैंकको आर्थिक सहयोग तथा लायन्स क्लब अफ सिद्धार्थनगर टुलिपको सहकार्यमा किशोरी महिलाहरुलाई निःशुल्क सेनेटरी प्याड बनाउने तालिम सम्पन्न भएको हो ।
उक्त कार्यक्रमका प्रमुख अतिथि तथा साइन रेसुङ्गा डेभलोपमेन्ट बैंकका क्लसटर हेड सतीश कुमार द्विवेदीले कार्यक्रम धेरै राम्रो भएको र महिला संग सम्बन्धित कुनै पनि कार्यक्रम योजनाहरु छन् भने त्यसमा बैंकले सहकार्य गर्ने जनाउनु भयो । साथै उनले भने “आज एकदिनलाई मात्र नभई हामी ३६५ दिन यहि छौ र बैंक सधै सहयोग गर्न तत्पर हुनेछ । ”
आस्था महिला उद्यमी संघका अध्यक्ष मिनिता थापाले निम्न वर्गका महिला किशोरीहरुलाई यो तालिम प्रभावकारी हुने बताईन । आफनै हातले बनाएको यो प्याडले इन्फेक्सन नहुने र धेरै महिला किशोरीहरुका लागि यो तालिमले निकै सहयो हुने पनि बताईन ।
महिनावारीको समयमा किशोरीहरुमा विद्यालय आउन समेत नसक्ने अवस्था रहने हुनाले उनीहरुको स्वास्थ्य अवस्थालाई मध्यनजर गर्दै आफैले बनाएको प्याड प्रयोग गर्नसके स्वास्थ्यका लागि पनि राम्रो हुने उद्देश्यले तालिम दिइएको अध्यक्षले बताउनुभयो । किशोरीहरुलाई धोएर पुनः प्रयोग गर्न सक्ने कपडा प्रयोग गरेर बनाउन सिकाइएको पनि उनले जानकारी दिनुभयो ।
सहभागीहरुले यसरी तालिम लिनु पाउदा धेरै रमाइलो र केही सिक्ने अवसर पाउदा खुसी लागेको बताएका छन ।
त्यस्तै, किशोरीहरुले महिनावारीको समयमा ध्यान दिनुपर्ने कुराहरु, स्वस्थ तरिकाले प्याड प्रयोग गर्ने विधिबारे समेत तालिममा सिकाइएको थियो ।
उक्त कार्यक्रममा प्रमुख अतिथि तथा साइन रेसुङ्गा डेभलोपमेन्ट बैंकका क्लसटर हेड सतीश कुमार द्विवेदी, आस्था महिला उद्यमी संघका अध्यक्ष मिनिता थापा, संघका निवर्तमान अध्यक्ष विन्दु न्यौपाने, सामाजिक अभियान्ता ज्ञानु पौडेल, सिद्धार्थ संजाल रुपन्देहीका अनिल कुमार ज्ञवाली, संघका संयोजक तथा कार्य समिति सदस्य सम्झना रेग्मी, वरिष्ठ उपाध्यक्ष माया खनाल लगाय विभिन्न संघ संस्थाका महिला किशोरीहरुको उपस्थिति रहेको थियो ।
