झापा, ४ फागुन । प्याजमा जिल्लालाई आत्मनिर्भर बनाउने उद्देश्यले प्रधानमन्त्री कृषि आधुनिकरण परियोजनाले ५० प्रतिशत अनुदान दिएर कृषकलाई प्याज खेती प्रवद्र्धन सुरु गरेको छ ।

जिल्लाका शिवसताक्षी, अर्जुनधारा, गौरादह नगरपालिका, कमल, गौरीगञ्ज र झापा गाउँपालिकाका कृषक समूहहरुले ५० प्रतिशत अनुदानमा प्याज खेती सुरु गरेको प्रधानमन्त्री कृषि आधुनिकरण परियोजनाका प्रमुख रविन्द्र सुवेदीले बताउनुभयो । 

उहाँका अनुसार परियोजनामार्फत जिल्लामा साढे छ हेक्टर जमिनमा प्याज खेती सुरु गरिएको छ । महिला समूह र कृषक समुहद्वारा १० कठ्ठादेखि दुई विगाह जमिनमा किसानहरुले खेती गरिरहेको उहाँले बताउनुभयो । 

“प्याजको परनिर्भरतालाई घटाउन पनि अनुदान दिएर किसानलाई खेतीतर्फ प्रोत्साहन दिएको हो”, उहाँले भन्नुभयो, “किसानलाई प्याजको उन्नत वीउविजन, मल र सिंचाईमा अनुदानलगायत प्रोत्साहनको योजना अगाडि सारिएको हो ।” व्यवसायिक खेती प्रवद्र्धनका लागि परियोजनाले चालु आर्थिक बर्ष २०८१÷०८२ मा रु. आठ लाख ५० हजार बजेट विनियोजन गरेको छ ।

प्रमुख सुवेदीका अनुसार परियोजनाले प्याज खेतीका निमित्त खुल्ला रुपमा प्रस्ताव आव्हान गरेको थियो । १३ जना किसानले प्रस्ताव पेश गरे तापनि ११ जनाले मात्र खेती गरेको उहाँले बताउनुभयो । आयतीत प्याजको दिनानुदिन भइरहने मूल्यबृद्धिलाई समेत स्वदेशी उत्पादनले कम हुने उहाँको धारणा छ । 

गौरीगञ्ज गाउँपालिका–२ मा आदिवासी महिला कृषक समूहको अगुवाईमा दुई विगाह जमिनमा प्याज रोपण कार्य भइरहेको छ । समूहकी अध्यक्ष नविना राजवंशीले परियोजनाको रु. दुई लाख र समूहको रु. दुई लाख गरी रु. चार लाखमा प्याजको व्यवसायिक खेती गरिएको बताउनुभयो । 

उहाँले यसबाट आएको आम्दानीले समूहमा आवद्ध २१ जना कृषकहरुको हितमा खर्च गर्ने उद्देश्य लिएको बताउनुभयो । “हामीले पहिलोपटक ५० प्रतिशत अनुदान पाएपछि प्याजको व्यवसायिक खेती गरेका हौं”, उहाँले भन्नुभयो, “यो हाम्रो परीक्षण पनि हो । राम्रो भयो भने अर्को बर्ष थप जमिन लिजमा लिएर भए पनि खेती गर्छौं ।”