१५ भदौ २०८२, आइतवार
झापा, १५ भदौ । मेचीनगरको चारआलीस्थित पाउँ पाथिभरा मन्दिरमा भक्तजनले चढाएको भेटी लगायतबाट एक वर्षमा रु. एक करोड ४२ लाख ८१ हजार ६२१ संकलन भएको छ ।
पूर्वपश्चिम राजमार्गसँग जोडिएको मेचीनगर–१३ मा वि.सं. २०७१ मा स्थापना भएको यस मन्दिरको व्यवस्थापन गर्न पाउँ पाथिभरा उत्तरगंगा पर्यटन प्रवर्धन समिति गठन भएको छ ।
समितिका अध्यक्ष लोकराज ढकालले आर्थिक वर्ष २०८१/८२ मा दान पेटिकाबाट रु. ७४ लाख ७४ हजार ६३५, सहयोग रसिदबाट रु. ४४ लाख ४१ हजार ४३५, जिन्सी सामान विक्रीबाट रु. १२ लाख ३८ हजार ५०६ र आजीवन सदस्यताबाट रु. ८८ हजार ७७३ आम्दानी भएको बताउनुभयो ।
बैंकमा रहेको बचतको ब्याज वापत रु पाँच लाख ६० हजार, अनलाइनमार्फत आय रु. दुई लाख ५४ हजार र विविध आम्दानी वापत रु. ३० हजार ७२० रुपैयाँ संकलन भएको उहाँले जानकारी दिनुभयो ।
प्रसिद्ध पाथिभरा देवीको पाउ रहेको पवित्र स्थानको रुपमा पूजापाठ र दर्शन गर्न यस मन्दिरमा दैनिक सयौं भक्तजन आउने गर्छन् । भारतको पश्चिम बंगाल, सिक्किम, आसाम लगायतका स्थानबाट समेत यहाँ दर्शनार्थी आउने गरेका छन् ।
समितिले आम्दानीलाई बैंकमा जम्मा गर्ने र बैंकमार्फत नै खर्च गर्दै आएको जनाएको छ । आम्दानीबाट मन्दिरको पूजारी तथा कर्मचारीहरुको नियमित पारिश्रमिक दिने, आवश्यक भौतिक संरचना निर्माण गर्ने र भक्तजनको सुविधाका लागि विभिन्न खर्च गर्दै आएको छ ।
मन्दिरको शौचालय, धाम परिसरमा मार्वल तथा टायल्स बिछ्याउने कार्य र एउटा भवन समेत बनाउँदा सो आवमा रु. ५७ लाख खर्च भएको समितिका अध्यक्ष ढकालले बताउनुभयो । मन्दिरको नाममा रु. एक करोड १२ लाख २१ हजार ४४७ बैंक मौज्दात रहेको जनाइएको छ ।
समितिले चार जना गुरुसहित नौ जना कर्मचारीलाई करारमा नियुक्त गरेर पारिश्रमिक दिदै आएको छ । पण्डितजीहरुको पारिश्रमिक, खाना, दैनिक पूजापाठ आदिमा समेत खर्च हुँदै आएको छ ।
