१५ भदौ २०८२, आइतवार
झापा, १५ भदौ । मेचीनगर–१५ ज्यामिरगढीमा आगामी असोज ३ देखि ११ गतेसम्म त्रिवेणी युवा क्लवले अन्तर्राष्ट्रिय स्तरको फुटबल प्रतियोगिता आयोजना गर्ने भएको छ ।
ज्यामिरगढी माध्यमिक विद्यालयको मैदानमा हुने प्रतियोगितामा भारतका दुई र नेपालका छ वटा गरी आठ वटा उत्कृष्ट टिमले प्रतिष्पर्धा गर्ने भएका छन् ।
त्रिवेणी युवा क्लबले आइतबार मेची उद्योग बाणिज्य संघमा पत्रकार सम्मेलन गरेर उक्त कार्यक्रम बारे जानकारी दिएको हो ।
क्लबका अध्यक्ष विदुरसिंह खवासका अनुसार प्रतियोगितामा झापा एफसी, ब्रदर एफसी दमक, बेलबारी एफसी, सैनिक एफसी, रेडहर्स इलाम, भारतको मानेभञ्ज्याङ दार्जीलिङ र भारतकै कस्र्याङको युके एफसीले भाग लिनेछन् ।
प्रतियोगिताका विजेता टिमले रु. दुई लाख र उपविजेताले रु. एक लाख नगद पुरस्कारसहित ट्रफी, मेडल र प्रमाणपत्र पाउने खवासले बताउनुभयो ।
पत्रकार सम्मेलनमा वडा नम्बर १५ का वडाध्यक्ष गुणराज भट्टराईले वडा कार्यालयले प्रतियोगिताका लागि रु. एक लाख सहयोग गर्ने बताउनुभयो ।
प्रतियोगितामा रु. २१ लाख खर्च हुने अनुमान गरिएको छ ।
पत्रकार सम्मेलनको सहजिकरण क्लबका सचिव मनिष गहतराजले गर्नु भएको थियो । कार्यक्रममा रेफ्री लक्ष्मण जयसवाल, क्लवका सल्लाहकार राजकुमार कटुवाल, मनोज कटुवाल, मेचीनगर–१० का वडा सदस्य सोम ओझा लगायतको उपस्थिति रहेको थियो ।
