२० फागुन २०८०, आइतवार

‘ब्लडमनी’ तिरेर फर्किएका सुवास भन्नुहुन्छ–“अब विदेश जान्न”

१२ पुष २०८०, बिहिवार
Image

झापा, १२ पुस  ‘ब्लडमनी’ तिरेर घर फर्किन सफल कनकाई–४ का ३३ वर्षीय सुवास राउत वैदेशिक रोजगारीको क्रममा बिताएका त्रासदीपूर्ण क्षणहरु बिर्सन चाहनुहुन्छ । किनकि, उहाँ अब स्वदेशमै रोजगारीको लयमा फर्किनु भएको छ ।

“अब विदेश जान्न,” हालै स्वदेश फर्किनु भएको उहाँ भन्नुहुन्छ–“गाउँकै पानी उद्योगमा सानो काम गर्न थालेको छु । भविष्य के कस्तो होला भन्न सकिन्न, तर अब स्वदेशमै गरिखाने हो ।”

पाँच वर्ष अघि कतार जानु भएको उहाँलाई केही वर्षमै साथी हत्याको झुठो आरोपमा अदालतले मृत्युदण्डको फैसला सुनायो । ब्लडमनी वापत रु. ९० लाख तिर्नुपर्ने भनी अदालतले दिएको विकल्प पनि असम्भव जस्तै थियो ।

मृत्युको मुखमा पुगिसकेका राउतलाई गाउँलेहरुले बचाएर एक महिना अघि स्वदेश ल्याएका छन् । गाउँलेले चन्दा उठाएर ब्लडमनी तिरेपछि मृतकका परिवारले उहाँलाई माफी दिएका थिए भने त्यसकै आधारमा अदालतले उहाँलाई स्वदेश फर्किन अनुमति दिएको थियो ।

स्वदेश फर्केपछि उहाँ गाउँकै कनकाई बेभरेज नामक पानी उद्योगमा काम गर्न थाल्नुभएको छ । उहाँकी पत्नी कुमारी राउत घर निर्माणको काममा मजदुरी गर्दै आउनु भएको छ । राउत दम्पत्तिका एक छोरी र एक छोरा छन् । बाह्र वर्षीया छोरी र आठ वर्षीय छोरो स्थानीय विद्यालयमा क्रमशः सात र एक कक्षामा पढ्दैछन् ।

आर्थिक अवस्था दयनीय

राउत परिवारको आर्थिक अवस्था दयनीय छ । खेती किसानी गर्ने जग्गा जमिन केही नभएका कारण छोराछोरी पढाउने र घरको गर्जो टार्ने उद्देश्यका साथ सन् २०१७ मा उहाँ कतार जानु भएको थियो । कतारमा उहाँले पानी फ्याक्ट्री र फर्निचर उद्योगमा श्रमिकको काम गर्नुभयो ।

विदेशको आर्जन घर पठाउन थालेको केही अवधिमै उहाँ जेल पर्नुभयो । त्यसपछि उहाँमा बाँचेर घर फर्किन पाइएला भन्ने आश नै मरिसकेको थियो । उहाँकी पत्नी कुमारी राउतले ज्याला मजदुरी गरेर छोराछोरीको पालनपोषण र पढाईको जोहो गर्नुभयो । गाउँलेहरुले सहयोग नजुटाएको भए परिवारले ब्लडमनी बुझाउने अवस्था नरहेको उहाँले बताउनुभयो । 

बस्नका लागि कनकाई–४ को एक कठ्ठा ऐलानी जग्गामा सानो भुइँघर छ । त्यसको धनीपूर्जा कहिले पाइने हो टुंगो छैन । “वडा कार्यालयमा जग्गाको धनीपूर्जा पाउँ भनेर निवेदन दिएका छौं”– कुमारी राउतले भन्नुभयो ।

उहाँले पति कतारको जेलमा परेपछि घर चलाउन रु. चार लाख जति ऋणमा परेको बताउनुभयो । सुवास कतारको जेलमा परेको खबर सुनेर आमा दुर्गामाया राउतको मृत्यु भएको थियो । आमाको काजकिरिया उहाँले स्वदेश फर्केर आएपछि गर्नुभयो ।

रोजगारी दिने कनकाई बेभरेजका सञ्चालक किरण दवाडीले ब्लडमनी तिरेर आए लगत्तै आफुले रोजगारी दिएको बताउनुभयो । “विदेश जानुभन्दा अगाडि पनि हाम्रो फ्याक्ट्रीमा काम गर्नुभएको थियो,” दवाडीले भन्नुभयो–“साह्रै सोझो र इमानदार हुनुहुन्छ । त्यस्तो मान्छेलाई अदालतले मृत्युदण्डको फैसला सुनाउँदा हामीलाई पत्यार लागेको थिएन । उहाँ निर्दोष हो भनेरै सबै गाउँलेहरु ब्लडमनी रकम संकलन अभियानमा जुटेका थियौं ।”

यसरी सम्भव भयो पुनर्जीवन

कतारस्थित आफ्नो डेरामा २०७६ सालको चैततिर साथीहरुको जमघटमा झगडा हुँदा खोटाङ जिल्लाको ऐसेलुखर्क–५ का लामाकाजी राईको दुःखद् निधन भएको थियो । राई र राउत एउटै कोठामा बस्ने अत्यन्त मिल्ने साथी थिए । 

नुहाएर कोठामा आउँदा राईको शरीरमा छुरी गाडिएको अवस्था थियो भने अरु साथीहरु भागिसकेका थिए । साथी बचाउन खोज्दा लागेको फिंगर प्रिन्टका आधारमा अदालतले राउतलाई मृत्युदण्डको फैसला सुनाएको थियो ।

कहिल्यै मदिरा नखाने र झैझगडा नगर्ने स्वाभावको राउतलाई यस्तो अभियोग लागेको विषयमा गाउँलेलाई पत्यार लागेको थिएन । कतारमा सम्पर्क गर्दा राउतले आफु निर्दोष रहेको बताएपछि कनकाई–४ का तत्कालीन वडा अध्यक्ष गोविन्द पौडेलको संयोजकत्वमा बचाउने अभियान सुरु गरिएको थियो ।

सोही अभियानले खोटाङ गएर मृतकको परिवारसँग सम्पर्क गरेको कनकाई–४ का वत्र्तमान वडाध्यक्ष रोशन सुबेदीले बताउनुभयो । “अभियानका साथीहरुले मृतकका परिवारलाई भेटेर ब्लडमनी वापतको रकम रु. १५ लाख बुझाउने सहमति गर्नुभयो,” वडाध्यक्ष सुबेदीले भन्नुभयो–“राउत निर्दोष थिए भन्ने कुरा राई परिवारलाई पनि महसुस भएको रहेछ । एउटा साथीको मृत्यु भयो, अर्को साथीलाई पनि किन जेलमा सडाउने भन्ने कोणबाट छलफल हुँदा राई परिवारसँग सहमति भएको हो ।”

ब्लडमनी जुटाउन ‘राउत बचाउ अभियान’ले स्वदेश र विदेशमा रहेका नेपालीबाट रकम संकलन गरेको थियो । अभियानबाट रु. २० लाख २४ हजार ६५० संकलन भएको र ब्लडमनी बुझाएर बचत रहेको रु. दुई लाख ५० हजार स्थानीय कनकाई बाल विकास केन्द्रलाई सहयोगवापत हस्तान्तरण गरिएको अभियानका सचिव किरण दवाडीले बताउनुभयो ।

सुवासलाई मृत्युदण्डबाट बचाएर स्वदेश फर्काउन कनकाई नगरपालिका, स्थानीयबासी, एनआरएन, कतार दूताबास लगायतबाट सहयोग प्राप्त भएको कनकाई नगरपालिकाका नगरप्रमुख राजेन्द्र पोखरेल बताउनुहुन्छ । “उहाँ निर्दोष हुनुहुन्थ्यो, त्यसैले ब्लडमनी जुटाएर फर्काउन केही सहज भयो,” नगरप्रमुख पोखरेल भन्नुहुन्छ–“नत्र ब्लडमनी जुटाउन नसकेर विदेशको जेलमा अहिले पनि कष्टपूर्ण जीवन बिताइरहनु भएको थुप्रै नेपालीहरु हुनुहुन्छ ।”

तीन वर्ष तीन दिन कतारको जेलमा बसेर घर फर्किनु भएको सुवास राउतको स्वास्थ्य अवस्था अहिले सामान्य छ । उहाँ पानी फ्याक्ट्रीको नियमित कामकाजमा लागिरहनु भएको छ । उहाँले आफ्नो स्वास्थ्यमा कुनै समस्या नभएको बताउनुभयो ।

लेखकको बारेमा
Image
अम्बिका भण्डारी
अम्बिका भण्डारी  राष्ट्रिय समाचार समितिको समाचारदाता समेत हुनुहुन्छ ।