२१ चैत २०८१, शुक्रवार
झापा, १३ फागुन । रिडर्स अभियान नेपालले आज पत्रकार सम्मेलन गरी रिडर्स फेस्टिबलको हिसाब सार्वजनिक गरेको छ ।
अभियानका अध्यक्ष सन्तोष आचार्यले मंसिर २८ देखि ३० गतेसम्म काँकरभिट्टाको मेची सामुदायिक हलमा आयोजित फेस्टिबल सफल बनाउन सहयोग पुर्याउने सबैमा धन्यवाद व्यक्त गर्नु भएको छ ।
कार्यक्रममा दाताहरुबाट रु। ३ लाख ६९ हजार ७७० सहयोग जुटेको र रु। ५ लाख ७८ हजार ९७० खर्च भएको उहाँले बताउनुभयो ।
कार्यक्रममा भएको खर्चमध्ये रु २ लाख ९ हजार २०० तिर्न बाँकी रहेको बताइएको छ ।
दाताहरुबाट स्वेच्छिक रुपमा संकलित सहयोगबाटै मेचीनगरमा ऐतिहासिक रुपमा फेस्टिबल सम्पन्न भएको उहाँको भनाई थियो ।
“पठन संस्कृतिको विकास र प्रवर्धन गर्ने उद्देश्यका साथ कार्यक्रमको आयोजना गरेका थियौं,” उहाँले भन्नुभयो–“विभिन्न चुनौति र अप्ठेराका बीच हामीले रिडर्स फेस्टिबललाई शानदार र उत्साहपूर्वक सम्पन्न गर्यौं ।”
फेस्टिबलमा मेचीनगरका विद्यालय, विद्यार्थी र प्रतिभाहरुको उल्लेख्य सहभागिता रहेको र पाठकहरुलाई केन्द्रमा राखेर गरिने फेस्टिबललाई आगामी दिनमा निरन्तरता दिइने अध्यक्ष आचार्यले बताउनु भएको छ ।
उहाँले फागुन १४ गतेदेखि रिडर्स झापाद्वारा साहित्य, कला उत्सव २०८१ अन्तर्गत मेचीनगरमा आयोजना हुने पर्यावरण विमर्शका सबै कार्यक्रममा सक्रिय सहभागी बनेर कार्यक्रमलाई सफल बनाउन आह्वान गर्नु भएको छ ।
