२० चैत २०८१, बिहिवार
झापा, २० फागुन । चरा तथा बन्यजन्तु संरक्षण अभियन्ता देबेन्द्र खरेलले नेपालमा ‘बैजनी बुंगेचरा’ नामको नयाँ चरा फेला पार्नु भएको छ ।
नेपाल पंछीविद् संघले उक्त चरा नेपालमा नयाँ रहेको पुष्टि गरेको खरेलले बताउनुभयो । ‘बैजनी बुंगेचरा’ फेला परेसँगै नेपालमा पाइने चराको संख्या अब ८९८ पुगेको छ ।
मेचीनगर–६ काँकडभिट्टा निवासी संरक्षण अभियन्ता खरेलले यसअघि ‘हरित परेवा’ नामक अर्को नयाँ चरा नेपालमा फेला पार्नु भएको थियो ।
खरेलका अनुसार ‘बैजनी बुंगेचरा’को अंग्रेजी नाम ‘पर्पल रम्प सनबर्ड’ हो । भारत, श्रीलंका लगायतका कतिपय मुलुकमा यो चरा पाइएको छ ।
चरा अवलोकनको क्रममा खरेलले २०८१ फागुन ७ गते विहान ८ः३० बजे काँकडभिट्टाको एक बगैचामा ‘बैजनी बुंगेचरा’को जोडीको पहिलो तस्वीर र भिडियो खिच्नु भएको थियो ।
खरेलले फागुन ९ गते उक्त तस्वीरलाई नेपाल बर्ड रेकर्ड कमिटीमा पुष्टिका लागि पठाउनु भएको थियो । संघका अध्यक्ष डा. तुलसी सुबेदीले मंगलवार प्रेस विज्ञप्तिमार्फत नेपालमा नयाँ चराको रुपमा ‘बैजनी बुंगेचरा’ थपिएको सार्वजनिक गर्नु भएको खरेलले बताउनुभयो ।
चरा तथा बन्यजन्तु संरक्षण समाजका अध्यक्ष समेत रहनु भएको चराविद् देबेन्द्र खरेलले नेपालबाट लोप भइसकेको ठानिएको ‘हङरायो’ नामक दुर्लभ चराको तस्वीर र भिडियो समेत खिचेर कीर्तिमान राखिसक्नु भएको छ ।
