१४ भदौ २०८२, शनिवार
झापा, २० साउन । विर्तामोड नगरपालिकामा उपप्रमुख नगेन्द्र संग्रौला र वडा नं. ८ का अध्यक्ष अजय कार्कीबीचको विवाद मिलाउने सहमति भएको छ ।
फेसबुकमा लेखेको टिप्पणीको विषयमा विवाद बढेर राजनीतिक तनाव र नाराजुलुसको अवस्था सिर्जना भएको थियो । तर, अब दुबै पक्ष मेलमिलापमा जान तयार भएका छन् ।
सम्बद्ध राजनीतिक दल नेकपा एमाले र राप्रपाका जिल्ला नेताहरुको पहलमा विवाद मिलाउने सोमवार सहमति भएको हो ।
लिखित सहमति सार्वजनिक गरिएको छैन । तथापि उपप्रमुख र वडाध्यक्षलाई गल्ती नदोहोर्याउने गरी समझदारी गराउन दुबै दल सहमत भएका हुन् ।
हाल उपमेयर संग्रौला काठमाडौंमा हुनुहुन्छ । उहाँ झापा आइसकेपछि दुबैलाई राखेर समझदारी गराइने भएको छ ।
एमालेका जिल्ला अध्यक्ष प्रेम गिरी र राप्रपाका जिल्ला अध्यक्ष केशव ओझाको पहलमा दलीय मेलमिलापको सहमति भएको हो ।
सो अवसरमा विर्तामोडको नगरप्रमुख पवित्रा महतरा प्रसाई, नेकपा एमालेका नगर अध्यक्ष सुभाष भट्टराई र राप्रपाका नगर अध्यष लक्ष्मी गौतम उपस्थित हुनुहुन्थ्यो ।
