९ मंसिर २०८१, आइतवार
झापा, २७ असार । भ्रष्टाचारको अभियोगमा मुद्धा दर्ता भएका कारण झापा गाउँपालिकाका अध्यक्ष जयनारायण साह पदबाट निलम्बित हुनुभएको छ ।
अख्तियार दुरुपयोग अनुसन्धान आयोगले उहाँसहित ११ जनाविरुद्ध झापा गाउँपालिका वडा नं. ३, ६ र ७ स्थित लक्ष्मीमार्ग सडक ग्राभेल परियोजनामा भ्रष्टाचार गरेको अभियोगमा आज विशेष अदालतमा मुद्धा दर्ता गरेको थियो ।
कानूनतः सार्वजनिक पदधारण गरेको व्यक्तिविरुद्ध अदालतमा भ्रष्टाचार मुद्धा दर्ता भएपछि पद स्वतः निलम्बित हुन्छ ।
साह निलम्बनमा परेपछि आज झापा गाउँपालिकाको बैठक बसेर उपाध्यक्ष अञ्जुदेवी थपलियालाई कार्यवाहक अध्यक्षको जिम्मेवारी दिइएको छ ।
अध्यक्ष साह र उपाध्यक्ष थपलिया दुबै जना नेपाली कांग्रेसबाट निर्वाचित जनप्रतिनिधि हुनुहुन्छ ।
अख्तियारले झापा गाउँपालिकाकी निवत्र्तमान उपाध्यक्ष कुन्तीदेवी बुढाथोकी, तत्कालीन प्रमुख प्रशासकीय अधिकृत चोलाराज दंगाल, वार्ड सदस्य फणिन्द्र खरेल, इन्जिनियर अभिषेक दास, सव इन्जिनियर विज्ञान चम्लगाई समेतलाई आरोपी बनाएर मुद्धा दर्ता गरेको छ ।
मुद्धा दर्ता भएकै कारण वार्ड सदस्य फणिन्द्र खरेल, इन्जिनियर अभिषेक दास र सव इन्जिनियर विज्ञान चम्लगाई समेत पदबाट निलम्बनमा पर्नुभएको छ ।
आर्थिक वर्ष २०७४÷०७५ को बिनियोजित बजेटबाट झापा गाउँपालिकास्थित लक्ष्मी मार्ग सडक खण्ड अन्तर्गत हनुमान चोकदेखि सिमलबाडीसम्मको ७ किलोमिटर बाटो बनाउँदा झुठा प्रगति विवरण र अनुगमनको आधारमा २२ लाख ९ हजार ८२३ रुपैयाँ ४० पैसा अबैध रुपमा भुक्तानी गरेको अख्तियारको आरोप छ ।
आरोपीहरुमा लक्ष्मी मार्ग बाटो उपभोक्ता समितिका अध्यक्ष धनपति थपलिया, सचिव फणिन्द्रप्रसाद खरेल र कोषाध्यक्ष शान्तादेवी सुब्बा राई भन्ने शन्तमाया सुब्बा लिम्बूले नगरपालिकासँग भएको सम्झौता बमोजिमको सर्त पालना नगरी, लागत अनुमान बमोजिम गर्नुपर्ने कामहरू नगरी भुक्तानी लिएको अख्तियारले दावी गरेको छ ।
झापा गाउँपालिका वडा नं. ६ का तत्कालीन वडाध्यक्ष हरिबहादुर बानियाँ, वडा नं. ७ का तत्कालीन वडाध्यक्ष नेत्रप्रसाद उप्रेती र वडा नं. ३ का तत्कालीन वडाध्यक्ष मोतीलाल गणेशविरुद्ध पनि मुद्धा दर्ता भएको छ ।
(स्रोत : कनकाई अनलाइन )
