९ मंसिर २०८१, आइतवार
झापा, १५ भदौ । विश्वभरिका अग्रवाल समुदायको कुलदेवी आद्य महालक्ष्मीको रथयात्रा भारतको अग्रोहा धामबाट आज नेपाल आइपुगेको छ ।
पाँच हजार वर्ष पुरानो अग्रसेन राज्यको राजधानी मानिएको भारतको हरियाणास्थित अग्रोहा धामबाट रथयात्रा सुरु भएको हो ।
भारत र भूटान हुँदै उक्त रथयात्रा आज विहान नेपाल प्रवेश गरेको रथयात्राका मेचीनगर संयोजक विजय डालमियाले बताउनुभयो ।
महालक्ष्मीको प्रतिमासहित आएको रथयात्रालाई प्रतिनिधिसभाकी उपसभामुख इन्दिरा रानामगरले काँकरभिट्टामा स्वागत गर्नु भयो । सो अवसरमा प्रदेश सांसद् गोपाल तामाङ, मेचीनगरकी उपप्रमुख मीना उप्रेती लगायतको उपस्थिति रहेको थियो ।
अग्रवाल समाज मेचीनगरले रथयात्रा आइपुगेको खुशीयालीमा उल्लास मनाएको छ । काँकरभिट्टामा रथयात्राको स्वागतार्थ कार्यक्रमको आयोजना गरियो भने महाआरती एवम् पूजा समेत उदघाटन गरिएको छ ।
उक्त समारोहलाई सम्बोधन गर्दै उपसभामुख रानामगरले प्रत्येक महिला महालक्ष्मीका स्वरुप भएको र मानवीय सेवाका लागि पैसा होइन भावना चाहिने बताउनु भयो ।
कार्यक्रममा प्रदेश सांसद गोपाल तामाङ, संविधानसभा सदस्य रविन कोइराला, मेचीनगर उपप्रमुख मिना उप्रेती, पत्रकार चन्द्र भण्डारी, सुरेशकुमार बंशल लगायतले शुभकामना मन्तव्य राख्नु भएको थियो ।
कार्यक्रममा अखिल भारतीय अग्रवाल समाजका बरिष्ठ उपाध्यक्ष सुरेश अग्रवालले उपसभामुख रानामगरलाई विशेष सम्मान गर्नु भएको थियो । कार्यक्रमको सभापति मेचीनगर संयोजक विजय डालमिया हुनुहुन्थ्यो ।
कार्यक्रममा मारवाडी समुदायले विभिन्न नृत्य प्रस्तुत गरेका थिए ।
रथयात्रा आज बिर्तामोड रात्री विश्राम गर्ने र भोलि धरान पुग्ने कार्यक्रम रहेको मेची संयोजक वेदप्रकाश अग्रवालले जानकारी दिनु भयो ।
