झापा, १७ पुस । नेपाली कांग्रेसले मेचीनगर नगरपालिकामा केही दिन यता विकसित घटनाक्रमलाई नजिकबाट नियालिरहेको जनाउँदै त्यसको समाधान ननिकाले मुकदर्शक नबन्ने चेतावनी दिएको छ ।
नगरपालिकामा जनप्रतिनिधि र कर्मचारीबीच द्वन्द्व चर्किएको र त्यसबाट नगरबासीले सास्ती व्यहोर्नु परेको विषयमा कांग्रेसले आज प्रेस विज्ञप्तिमार्फत आफ्नो धारणा सार्वजनिक गरेको हो ।
पार्टीको झापा–१ का क्षेत्रीय सभापति इन्द्र बुढाथोकीले हस्ताक्षर गर्नु भएको उक्त विज्ञप्तिमा नगरपालिका सुशासनयुक्त र भ्रष्टाचारमुक्त हुनुपर्ने उल्लेख गरिएको छ ।
नेपाली कांग्रेसले मेचीनगर नगर नेतृत्वलाई प्रमुख प्रशासकीय अधिकृत नटिक्ने र जनप्रतिनिधिसँग पटकपटक विवाद हुनुपर्ने कारण के हो भनेर प्रश्न गरेको छ ।
“प्रमुख प्रशासकीय अधिकृत छोटो छोटो समयमा यहाँबाट अन्यत्र जानुपर्ने, जुनसुकै प्रमुख प्रशासकीय अधिकृत आउँदा पनि जनप्रतिनिधिहरुसँग नै पटकपटक विवाद हुनुपर्ने आखिर समस्या मेचीनगरमा आउने प्रमुख प्रशासकीय अधिकृतको मात्र हो त ?,” विज्ञप्तिमा प्रश्न सोधिएको छ–“कि समस्या मेचीनगरभित्रै छ ?”
कांग्रेसले ढुंगागिटीको विषयले विवाद निम्त्याएको जनाउँदै जनप्रतिनिधि र कर्मचारीबीचको झगडाले आम नगरबासी पीडित बन्न पुगेको ठहर गरेको छ ।
नगरपालिका दैनिक युद्धमैदान जस्तो बन्नुले नगरबासीले अपमानित महसुस गरेको र नगरमा कुशासन र भ्रष्टाचार मौलाएको कांग्रेसले दावी गरेको छ ।
नगरपालिकालाई अमुक पार्टीका कार्यकर्ता उतारेर युद्धमैदान बनाउने कार्य भइरहेकोमा आपत्ति व्यक्त गर्दै कांग्रेस पार्टीले नगरबासीले नियमित सेवा नपाउने अवस्था सिर्जना भइरहेमा पार्टीले नगर नेतृत्व र अवरोध गर्ने जोकोहीविरुद्ध संघर्षका कार्यक्रम मैदानमा उत्रिने चेतावनी दिएको छ ।
नगरपालिका र नगरबासीको अपमान हुनेगरी हालै भएका दूव्र्यवहारमा संलग्न दोषीमाथि कार्वाही गरिनु पर्ने माग गर्दै कांग्रेसले नगरका आन्तरिक समस्याको निराकरण नगर नेतृत्वले गर्नुपर्ने धारणा व्यक्त गरेको छ ।
