२५ वैशाख २०८१, मङ्गलवार
झापा, १३ फागुन । झापा गाउँपालिका वडा नं ४ को भामटोलीमा शुक्रवार दिउँसो आगलागी हुँदा एक बालकको मृत्यु भएको छ ।
दिउँसो ४ः३० बजेको समयमा स्थानीय ईनाम हुसेन शेखको घर र नजिकै रहेको परालको कुन्यूमा आगलागी भएको थियो ।
आगलागी हुँदा परालको कुन्यूको चेपमा खेलिरहेको ४ बर्षीय अतिप हुसेनको घटनास्थलमै मृत्यु भएको प्रहरीले जनाएको छ।
शेखको एकतले टिनको छानो भएको कच्ची घर समेत जलेर नष्ट भएको छ । परालको कुन्यूको चेपमा बालक खेलिरहेको कसैले थाहा पाएका थिएनन् ।
आगलागी पछि मात्र बालकको मृत्यु भएको थाहा भएको बताइएको छ ।
प्रहरी, स्थानीयबासी, भद्रपुर र बिर्तामोड नगरपालिकाको दमकलको सहयोगमा आगो निभाइएको थियो ।
