झापा, २९ बैशाख । सवारी दुर्घटना न्यूनीकरणका लागि झापामा प्रहरीले ‘दुई पांग्रे सवारी चालकसँग ट्राफिक प्रहरीको पाँच मिनट’ अभियान सञ्चालन गरेको छ ।

जिल्ला ट्राफिक प्रहरी कार्यालय विर्तामोडका प्रमुख नवराज न्यौपानेले दुर्घटनामा ज्यान गुमाउनेहरुमा सबैभन्दा बढी मोटरसाइकलका यात्रु हुने गरेकाले दुई पांग्रेका चालकहरुलाई लक्षित गरी सचेतनामूलक अभियान सुरु गरिएको बताउनुभयो ।

गत वैशाख १२ गते शिवसताक्षीको झिलझिलेबाट कनकाई नदीमा नुहाउन एकाविहानै गएका तीन युवाको मोटरसाइकल दुर्घटनामा परी मृत्यु भएको थियो । युवाहरु सवार मोटरसाइकल विपरीत दिशाबाट आइरहेको बोलेरो जिपसँग ठोक्किएको थियो ।

उक्त दुर्घटनामा परी कमल–४ का २५ वर्षीय मौसम राई, २० वर्षीय युनिस भण्डारी र १७ वर्षीय सरोज रेग्मीको मृत्यु भएको थियो । मोटरसाइकल दुर्घटनामा ज्यान गुमाउनेहरु प्राय कम उमेरका छन् ।

चालू आर्थिक वर्ष २०८०/०८१ को नौ महिनामा झापामा सवारी दुर्घटनामा ५३ जनाको मृत्यु भएको थियो । जसमध्ये मोटरसाइकल दुर्घटना भएका कारण मृत्यु हुने ३९ जना रहेको न्यौपानेले जानकारी दिनुभयो । उक्त अवधिमा ४६३ वटा सवारी दुर्घटना भएकोमा मोटरसाइकलको संख्या २८८ रहेको थियो ।

“मोटरसाइकल दुर्घटनाको अवस्था भयावह बन्दै गएको छ,” उहाँले भन्नुभयो–“सवारी चालकलाई सजग गराउँदा दुर्घटना न्यूनीकरण हुन्छ भन्ने सोचेर ट्राफिक प्रहरीसँग पाँच मिनट अभियान चलाएका हौं ।” 

अभियानलाई पूर्वपश्चिम राजमार्गमा केन्द्रित गरिएको छ । अभियान अन्तर्गत ट्राफिक प्रहरीको टोलीले गुडिरहेका मोटरसाइकललाई किनारामा रोकेर चालकलाई पाँच मिनेट सवारी नियम र सुरक्षा सम्बन्धी प्रशिक्षण दिने गरेको छ । 

साँघुरो सडक, अत्याधिक सवारी चाप र तीव्र गति नै मोटरसाइकल दुर्घटनाको मुख्य कारण देखिएको छ । कान छोपिने हेल्मेट लगाउन, मदिरा सेवन गरेर सवारी नचलाउन र तीब्र रफ््तारमा नकुदाउन जिल्लाका ट्राफिक प्रहरी प्रमुख न्यौपानेले आग्रह गर्नु भएको छ ।

‘दुई पांग्रे सवारी चालकसँग ट्राफिक प्रहरीको पाँच मिनट’ अभियानमा खटिएका प्रहरीले मोटरसाइकलका चालकहरुलाई दुर्घटना हुनै नदिने उपायका लागि आवश्यक सतर्कताका बारेमा संक्षिप्त प्रशिक्षण दिने गरेका छन् ।

मोटरसाइकल दुर्घटनामा परी ज्यान गुमाउनेहरुमा २५ वर्षमुनिका युवाको संख्या उल्लेख्य रहेको प्रहरीको भनाई छ । लागू पदार्थ र मदिरा सेवन गरेर मोटरसाइकल हाँक्ने व्यक्तिहरु दुर्घटनाको उच्च जोखिममा पर्छन् ।