१० मंसिर २०८१, सोमवार
झापा, १९ जेठ । कृषि, पशुपंक्षी तथा सहकारी मन्त्री ज्वालाकुमारी साहले दुग्ध उत्पादक किसानहरुले चाँडै भुक्तानी पाउने व्यवस्था मिलाइने बताउनु भएको छ ।
विश्व दुध दिवसको उपलक्ष्यमा राष्ट्रिय दुग्ध विकास बोर्डद्वारा आज झापाको मेचीनगरमा आयोजित कार्यक्रममा बोल्दै उहाँले सरकारी स्वामित्वको दुग्ध विकास संस्थान र निजी डेरी उद्योगहरुले किसानबाट खरिद गरेको दुधको महिनौंदेखि भुक्तानी नदिइरहेको भन्ने गुनासो आएको बताउनुभयो ।
“दुग्ध उत्पादक किसानहरुले चाँडोभन्दा चाँडो भुक्तानी पाउनुपर्छ भन्नेमा हामी स्पष्ट छौं,” उहाँले भन्नुभयो–“मैले थुप्रै व्यावसायिक किसानको गाईगोठ र डेरी उद्योगहरु अवलोकन गरेको छु । किसानहरुले दुधको भुक्तानी नपाएको गुनासो सुनाउनु भएको छ । जुन तरिकाले भए पनि भुक्तानी हुनुपर्छ भन्ने हाम्रो मान्यता हो ।”
उहाँले पछिल्लो समय मुलुकमा दुधको उत्पादन बढेको जनाउँदै यसलाई निर्यात गर्नका लागि आवश्यक पहलहरु भइरहेको बताउनुभयो । दुग्ध विकास संस्थानमा अहिले सरकारी भण्डारमा रु. एक अर्ब २५ करोडभन्दा बढी मूल्यको दुग्धजन्य उत्पादन विक्री नभएर थन्किरहेको उहाँले जानकारी दिनुभयो ।
मुलुकलाई समृद्ध र जनतालाई सुखी बनाउने राष्ट्रिय आकांक्षा पूरा गर्नका लागि दुधमा आत्मनिर्भर भएरमात्र नपुग्ने बताउँदै उहाँले यसको विदेश निर्यात अपरिहार्य भइसकेको औंल्याउनु भयो । दुधबाट बनेका बस्तुहरु निर्यातका लागि निर्यातको सहज व्यवस्था हुन सके किसानले बेचेको दुधको भुक्तानी गर्न कुनै समस्या नहुने उहाँले बताउनुभयो ।
कोशी प्रदेश सरकारकी राज्यमन्त्री सिर्जना राईले दुग्ध पदार्थमा आधारित उद्योग सञ्चालन र बस्तु प्रबर्धनमा प्रदेश सरकारले उल्लेखनीय अनुदान दिदै आएको बताउनुभयो ।
किसानहरुलाई दुध उत्पादनका आधारमा र व्यावसायिक कृषकहरुलाई गोठ निर्माण र आहार उत्पादनमा अनुदान दिने गरिएको उहाँले जानकारी दिनुभयो ।
सोही कार्यक्रममा बोल्दै दुग्ध विकास संस्थानका महाप्रबन्धक राजेन्द्रप्रसाद अधिकारीले चरणबद्ध रुपमा किसानको दुधको भुक्तानी गर्ने व्यवस्था मिलाइएको जनाउँदै दुई दिनभित्र नयाँ भुक्तानी रकम आइपुग्ने जानकारी दिनुभयो ।
उहाँले दुध उत्पादक किसान र व्यवसायीहरुका समस्याको समाधानका लागि संस्थानले पहल गर्ने जनाउनुभयो । उहाँले संस्थान र निजी क्षेत्रका गोदामहरु दुधजन्य उत्पादनको भण्डारणले भरिएको हुँदा यसको विक्री वितरणको चाँडो व्यवस्था नभए आउँदो आर्थिक वर्षको सुरुदेखि नै नयाँ उत्पादन राख्ने ठाउँ नहुने बताउनुभयो ।
कोशी प्रदेश डेरी उद्योग समितिका संयोजक रामचन्द्र उप्रेतीले एक दशकमा कोशी प्रदेशमा ११ वटा ठूला डेरी उद्योग सञ्चालनमा आएको उल्लेख गर्दै प्रदेश सरकारकै रु. २० करोाड अनुदानमा निजी क्षेत्रका उद्योगीहरुले रु. ३० करोडको लागतमा पाँ केएल क्षमताको पाउडर उद्योग स्थापना गरेको बताउनुभयो ।
मेचीनगर–१४ दुहागढीस्थित एनएमसी एग्रो फार्मको गाईगोठमा गरिएको उक्त कार्यक्रममा उत्कृष्ट डेरी उद्योगको रुपमा एनएमसी डेरी उद्योग, उत्कृष्ट सहकारीको रुपमा चितवनको पिठुवा दुग्ध उत्पादक सहकारी र सुनसरीको कामधेनु दुग्ध विकास सहकारी संस्था, उत्कृष्ट कृषकको रुपमा झापाका राजकुमार तामाङ र मोरङका विज्ञान बस्नेतलाई सम्मानित गरिएको थियो ।
आर्थिक अभियान पत्रिकाका समाचारदाता प्रशान्त खड्कालाई उत्कृष्ट सञ्चारकर्मीको रुपमा सोही अवसरमा सम्मानित गरिएको थियो । मन्त्री साहले सम्मानित सबैलाई खादा ओढाएर कदर पत्र प्रदान गर्नु भएको थियो ।
