८ कार्तिक २०८१, बिहिवार
झापा, २३ साउन । एक पछि अर्को हवाई दुर्घटनाले नेपाली आकाश असुरक्षित छ भन्ने आशंकालाई फेरि बल पुग्नेगरी आज हेलिकोप्टर दुर्घटना भएको छ ।
चार जना चिनिया नागरिक लिएर काठमाडौंबाट उडेको एयर डाइनेस्टीको एउटा हेलिकोप्टर आज अपराह्न नुवाकोटको शिवपुरीमा दुर्घटना भएको हो ।
दुर्घटनामा पाइलटसहित पाँचै जनाको मृत्यु भएको छ ।
केही दिनअघि काठमाडौंबाट पोखरा उडेको सौर्य एयरको जहाज काठमाडौंमै दुर्घटना हुँदा १८ जनाको मृत्यु भएको थियो ।
आजै अन्नपूर्ण एयरलायन्सको अर्को हेलिकोप्टर काठमाडौंबाट वैतडी जाँदै गर्दा बाँकेको सोनारीमा आकस्मिक अवतरण गराउनु परेको छ ।
सरकारले एयर डाइनेस्टी हेलिकप्टर दुर्घटना छानबिन गर्न ३ सदस्यीय जाँचबुझ आयोग गठन गरेको छ ।
दुर्घटनापछि बसेको मन्त्रिपरिषद्को आकस्मिक बैठकले नेपाली सेनाका वरिष्ठ पाइलट सुवास थापा संयोजक रहेको जाँचबुझ आयोग गठन गरेको सञ्चारमन्त्री पृथ्वीसुब्बा गुरुङले जानकारी दिनुभयो ।
समितिको सदस्यमा तनुजा पोखरेल र विष्णु बस्नेत छन् । उक्त समितिलाई ३० दिनको समय सीमा तोकिएको छ ।
