१० मंसिर २०८१, सोमवार
झापा, १० भदौ । श्रीकृष्ण जन्माष्टमी पर्वको अवसरमा आज जिल्लाका विभिन्न मन्दिरमा उत्सवको आयोजना गरिएका छन् ।
द्वापर युगमा भगवानको अवतार लिएर श्रीकृष्णले आजै जन्म लिनु भएको हुँदा आज श्रीकृष्णको मठमन्दिरमा विशेष पूजापाठ र कार्यक्रम गरेर उत्सव मनाउने गरिएको छ ।
झापाको धुलाबारी, चन्द्रगढी, ज्यामिरगढी, भद्रपुर, बुधवारे, दुधे, दमक, विर्तामोड, शनिश्चरे लगायतका स्थानमा जन्माष्टमी विशेष कार्यक्रम गरिने भएका छन् ।
यसैबीच, मेचीनगर वडा नं. १० धुलाबारीमा रहेको श्रीकृष्ण प्रणामी मन्दिरमा आज अपराह्न ५ बजे श्रीकृष्ण प्राकट्य महोत्सवको अवसरमा महाआरती कार्यक्रम गरिने भएको जनाउँदै उपस्थितिका लागि सम्पूर्ण नगरबासीलाई अनुरोध गरिएको आयोजक समितिका गोकुल खड्काले बताउनुभयो ।
मन्दिरमा आज विहानदेखि नै पूजा अर्चना भइरहेको र राति १२ बजेसम्म कार्यक्रम चलिरहने उहाँले जानकारी दिनुभयो ।
भद्रपुर वडा नं. ९ प्रणामीनगर र मेचीनगर वडा नं. १५ ज्यामिरगढीस्थित श्रीकृष्ण मन्दिरमा पनि श्रीकष्ण प्राकट्य महोत्सवको अवसरमा विविध कार्यक्रमको आयोजना गरिएको जनाइएको छ ।
