२० पुष २०८१, शनिवार
मेचीनगर, १७ पुस । दक्षिण झापाको बनियानीबाट नौ किलोमिटर पश्चिम दिपज्योति सामुदायिक बनमा जंगली हात्तीको आक्रमणमा परी आज स्थानीय एक महिलाको मृत्यु भएको छ ।
प्रहरी स्रोतका अनुसार उक्त घटना कचनकबल वडा नं. ७ मा भएको हो । मृतक केलावती राजबंशी ३४ वर्षकी थिइन् ।
सामुदायिक बनमा साथीहरुसँग घाँस र दाउरा खोज्न गएकी उनलाई आज १२ बजेतिर एक्ले हात्तीले लखेटेको थियो । हात्तीको लखेटाइले महिलाहरुको भागाभाग भएको थियो । सो घटनामा केलावती जंगलमै वेपत्ता भएकी थिइन् ।
घण्टौपछि ९ किलोमिटर टाढाबाट आएको इलाका प्रहरी कार्यालय बनियानीको टोलीले जंगल सर्च गर्दा घाइते अवस्थामा उनलाई उद्धार गरेको थियो ।
उद्धारपछि भद्रपुरको ओमसाई पाथिभरा हस्पिटल र पछि प्रादेशिक अस्पतालमा उनको उपचार गरेर बचाउने प्रयास भएको थियो । तर, उनलाई चिकित्सकहरुले बचाउन सकेनन् ।
