झापा, ८ माघ । हेल्लो अमेरिका मिडियाका सम्पादक तथा सिनेमेटोग्राफर सम्राट कार्कीसहित सात जना पत्रकार ‘कम्युनिटी मिडिया अवार्ड २०२५’बाट पुरस्कृत हुनुभएको छ । 

मिडियालाई समुदायमा जोड्न अतुलनीय भूमिका खेलेवापत कार्कीसहित ७ जना सञ्चारकर्मीलाई अमेरिकाको न्यूयोर्कबाट सञ्चालित त्रिवेणी टाइम्सले आफ्नो प्रथम वार्षिकोत्सवका अवसरमा पहिलोपटक उक्त सम्मान प्रदान गरेको हो । 

न्यूयोर्कमा आयोजित एक विशेष समारोहमा उनीहरुलाई अवार्ड प्रदान गरिएको त्रिवेणी टाइम्सले जनाएको छ ।

अवार्डसँगै न्यूयोर्क राज्यको एसेम्बली मेम्बर जेनिफर राजकुमारको अफिसले सम्मानपत्र समेत उपलब्ध गराएको छ । कम्युनिटी मिडिया अवार्ड २०२५ पाउनेमा नेपालबाट अन्नपूर्ण मिडिया नेटवर्कका महाप्रबन्धक मनोज बस्नेत, दुनिया इन्टरनेसन एण्ड ग्लोबल टिभी अमेरिकाका मन्जुर हुसैन, तोर मेनस्ट्रीम मिडिया अमेरिकाका हरप्रित सिंह, हेलो अमेरिकाका सम्राट कार्की, बंगलादेश प्राटिशनका लोबलु अन्सार, चाइना प्रेसकी युई जी र जिएमए नेटवर्क अमेरिकाका डेव लावानेश हुनुहुन्छ ।

न्यूयोर्कमा स्टुडियो रहेको नेपाली मिडिया हेल्लो अमेरिकामा वरिष्ठ निर्देशक किशोर सुव्वा, सहनिर्देशक टोमा लामा र लोकप्रिय प्रस्तोता सुमन थाम्सुहाङ लिम्वु कार्यरत हुनुहुन्छ । यसले न्यूयोर्क तथा वरिपरिका राज्यहरूमा सक्रिय र अमेरिकामा वसेका नेपालीहरूको वास्तविक कथा संसारभर पुर्याउन योगदान दिइरहेको त्रिवेणी टाइम्सका सञ्चालक नवराज केसीले वताउनुभयो ।